Синер пак ќе мора да се брани

Судот за спортска арбитража во Лозана (ЦАС) ќе одлучува за иднината на најдобриот светски тенисер Јаник Синер.

Италијанецот беше позитивен на забранетиот клостебол во март, ама не доби суспензија и беше „помилуван“. Сепак, тогаш Светската антидопинг агенција (ВАДА) се пожали до ЦАС, каде што случајот е одново отворен.

Во одбрана на италијанскиот ас застана поранешниот тенисер Емилио Санчез, кој се надева дека нема да има суспензија за Синер.

„Процесот веќе е спроведен, но ВАДА изрече поинакви санкции за слични случаи. Синер ќе мора пак да се брани. Никој не посакува тој да биде позитивен. Тажно е што се мисли дека постои тенденција да се размислува дека не им се суди на сите еднакво. Синер загуби на имиџот, а така и тенисот“, смета Шпанецот.

ЦАС на почетокот на 2025 година ќе го разгледа случајот и ќе одлучи дали ќе го потврди ослободувањето на Синер од вина.