Со донација од јапонската фондација ИСЦ, реновирана салата за приредби на ДУРДМОВ “Димитар Влахов”. Директорот Горанчо Јакимовски се заблагодари на донацијата нагласувајќи дека парите со кои е реновирана салата за приредби им го разубави просторот на вработените и на учениците.
– Заедно ќе ги споделуваме сите радосни настани во нашето училиште, а воедно ќе имаме можност и да го следиме развојот на потенцијалот и талентот на нашите ученици – истакна Јакимовски.
Со извршените градежни зафати, салата за приредби беше целосно реновирана. Истата доби нов под, нова бина, целосно нова електрична инсталација, се изврши варосување, се поставија нови тапацирани столчиња и завеси.
– Како и сите останати луѓе, така и луѓето што имаат проблем со видот имаат сопствени таленти. Ние разбираме дека тие луѓе имаат потешкотии да се снајдат во средината и се надеваме и посакуваме преку вакви проекти што повеќе да им го олесниме функционирањето, како и развивањето на сопствените таленти – изјави Фиројоши Комода, потпретседател на бордот на директори на фондацијата ИСЦ.
