Општина Кисела Вода започнува сo реализација на проект за проширување и реконструкција на дел од градинката „Пеперутка 1”, во Драчево, објект во кој не е интервенирано околу половина век.
Градоначалникот Ѓорѓиевски кој објави дека е распишан тендерот за избор на најповолен изведувач за овој проект, го честиташе денешниот 20 Ноември, Светскиот ден на децата и потенцираше дека најдобар начин тој да се одбележи е да се реализираат проекти кои значат унапредување на условите за најмладите.
Додаде дека наскоро во дворот на објектот „Кокиче”, чиј капацитет неодамна беше проширен за уште 90 дечиња, започнува изградба на сосема нов дел, објект „Верверичка”, со што дополнително се зголемува бројот на слободни места во градинките. Наведе и дека Општина Кисела Вода во овие две години стави во функција две нови градинки, а реализираше и голем број на неинфраструктурни инвестиции, за кои се издвоија речиси 17 милиони денари.
-Сметам дека најдобар начин да се одбележи Светскиот ден на детето е преку реализација на проекти што ги унапредуваат условите за нашите најмлади жители, кои во Општина Кисела Вода секогаш имаат приоритет – истакна Ѓорѓиевски.
Според него, остварувањето на правото на предучилишно образование е стратешка определба на која интензивно се работи.
– Имено на почетокот на мојот мандат имавме наследена состојба од преку 400 деца на листите за чекање, а по сите наши проекти- ставањето во функција на две нови градинки, едната во Драчево и втората во Усје, проширувањето на капацитетите на неколку објекти, таа бројка на деца што чекаат место во градинка е двоцифрен – нагласи Ѓорѓиевски.
Тој нагласи дека тенденцијата на која сериозно се работи е листите за чекање воопшто да ги нема.
-Воедно, големи се инвестициите кои ги имаме во сите наши градинки, а кои не подразбираат инфраструктурни зафати, туку нивно опремување со дидактички материјали, мебел, опрема и слично и за кои Општина Кисела Вода во овие две години инвестираше околу 17 милиони денари. Сево ова говори за една посветена работа во насока на унапредување на условите и правата на нашите најмлади, за кои овој предучилишен период е многу значаен и преставува темел во формирањето на личноста на секој поединец – изјави Ѓорѓиевски по повод одбележувањето на Светскиот ден на детето.
