„Мадам Батерфлај“ со Хироко Морита во НОБ во рамки на „Месецот на Пучини“

Во рамките на „Месецот на Пучини“, на 16 ноември, со почеток во 20 часот на сцената на Националната опера и балет, ќе се изведе операта „Мадам Батерфлај“ од Џакомо Пучини. Диригент на претставата е гостинот од Грција, Мирон Михајлидис, режијата е на Александар Текелиев од Бугарија, сценографијата на Живојин Трајановиќ, костимографијата на Лира Грабул, концерт-мајстор е Климент Тодороски, а хор-мајстор: Јасмина Ѓорѓеска, Ѓургица Дашиќ.

Во насловната улога ќе настапи гостинката од Јапонија, Хироко Морита, во улогата на Пинкертон ќе настапи, Ѓорѓи Цуцковски, во улогата на Шарплес, Флорин Естефан од Романија, а во останатите улоги ќе настапат: Марика Поповиќ, Дејан Стоев, Невен Силјановски, Јане Дунимаглоски, Соња Пендовска-Мадевска, Валентина Димитриевска, Олег Цуцковски, Никола Стојчески, Марко Гапо, Александар Тарабунов, Огнен Здравковски во придружба на хорот и оркестарот на Национална опера и балет.

„Ако не сум трогнат, ако либретото не ми го допре срцето…тогаш тоа не е за мене“ – Пучини точно знаел што бара во едно оперско либрето, а фактот што приказната за деликатната јапонска „пеперутка“ длабоко го трогнала се огледува во секоја нота од партитурата на неговата славна опера.

Инаку, ноември во НOБ е посветен на италијанскиот композитор Џакомо Пучини (22 декември 1858 – 29 ноември 1924) при што со четири опери се одбележуваат 100 години од смртта на безвремениот оперски мајстор. Притоа на 8 ноември беше изведена операта „Боеми“, а следуваат и „Тоска“ на 23 ноември и „Турандот“ на 29 ноември. На 19 ноември, пак, од 20 часот во фоајето на НОБ ќе се одржи ексклузивен гала настан „Жените на Пучини“, при што публиката ќе има можност да ужива во изведбите на некои од највпечатливите и најпопуларни арии на Пучини. Во исто време во фоајето е поставена изложба од богатата архива на НОБ, насловена како „Пучини низ историјата на МОБ“.