Зеленски тврди дека САД и Русија водат приватни разговори за целосен прекин на огнот

Украинскиот претседател Володимир Зеленски изјави дека се во тек приватни разговори меѓу Соединетите Американски Држави и Русија за целосен прекин на огнот. Тој верува дека, со доволен притисок врз Русија, може да се постигне договор во рок од неколку недели или месеци, рече Зеленски за време на состанокот со лидерите на територијалните заедници во регионот Чернихив, пренесе „Укринформ“.

„Во Саудиска Арабија, како што знаете, се согласивме на безусловен прекин на огнот. Русите сè уште не го прифатија. Тоа го гледаме. Сепак, свесни сме дека има разговори меѓу Американците и Русите за ова прашање. Овие приватни разговори се одвиваат. Без оглед на нашите различни ставови за некои прашања, сите сме обединети за да постигнеме прекин на огнот што е можно поскоро“, рече Зеленски.

Тој нагласи дека притисокот врз Русија останува клучен за обезбедување целосен прекин на огнот. „Верувам дека тоа може да се постигне во наредните недели, можеби месеци. Или може да се случи одеднаш – понекогаш во војна работите се менуваат за миг. За нас „жешката фаза“ значи целосен прекин на непријателствата“, додаде тој.

Сепак, Зеленски рече дека прекинот на огнот не значи крај на војната, туку „ја отвора вратата за вистинска дипломатија“.

Инаку, на состанокот во Ријад, Украина и САД постигнаа голем број клучни договори, вклучително и обезбедување безбедна пловидба во Црното Море, забрана за напади врз енергетската инфраструктура во Русија и Украина, продолжување на преговорите за размена на затвореници и напори за враќање на децата киднапирани од Русија. Овие договори стапија на сила веднаш по официјалното соопштение на Белата куќа на 25 март.