Украинскиот претседател Володимир Зеленски изјави дека е подготвен да разговара со американскиот претседател Доналд Трамп за да им се овозможи на САД пристап до украинските ретки метали.
Зафатените дипломатски активности би можеле да следат во следните недели, рече Зеленски во објавата на Телеграм, додавајќи дека ја цени соработката со Трамп.
Зеленски следната недела ќе присуствува на Минхенската безбедносна конференција, на која ќе бидат присутни американскиот потпретседател Џеј-Ди Венс и специјалниот пратеник на Трамп за Русија и Украина, Кит Келог, пишува „Политико“.
Трамп претходно изрази скептицизам за воената поддршка за Украина, но потоа рече дека е отворен за договор под услов Киев да ѝ дозволи на Америка да ги експлоатира украинските минерални ресурси, а Зеленски во интервју за Ројтерс рече дека е отворен за идејата.
„Американците помогнаа најмногу и затоа треба да заработат најмногу, и тоа е она за што би сакал да разговарам со Трамп“, рече Зеленски, додавајќи дека неговата идеја не била да им ги предаде ресурсите на САД, туку „заедно да влеземе во бизнисот“.
Тој додаде дека украинските складишта за гас се уште една област на можна соработка, откако Украина го суспендираше транзитот на руски гас во Европа.
„Подготвени сме да склучиме договори за испорака на американски течен гас за Украина и да бидеме центар за цела Европа“, рече Зеленски.
Трамп во петокот рече дека најверојатно ќе се сретне со Зеленски следната недела, но додаде дека одржува „многу добри односи“ со рускиот претседател Владимир Путин и најверојатно ќе разговара и со него.
