Зеленски по разговорот Трамп-Путин: „Ајде да го завршиме ова“

Украинскиот претседател Володимир Зеленски изјави дека имал „значаен“ разговор со американскиот претседател Доналд Трамп.

Разговорот, според Зеленски, се фокусирал на можностите за постигнување мир, соработка на различни нивоа и технолошките можности на Украина, вклучително и напредните индустрии како што е производството на беспилотни летала.

„Благодарен сум на претседателот Трамп за неговиот интерес за тоа што можеме да постигнеме заедно. Разговаравме и за мојата дискусија со американскиот министер за финансии Скот Бесент и за подготовка на нов документ поврзан со безбедноста, економската соработка и партнерството за ресурси“, нагласи Зеленски.

Во текот на разговорот, претседателот Трамп сподели и детали од неговиот разговор со рускиот претседател Владимир Путин.

„Никој не сака мир повеќе од Украина. Заедно со Соединетите Држави, ги обликуваме следните чекори за да ја запреме руската агресија и да обезбедиме траен, сигурен мир. Како што рече претседателот Трамп: „Ајде да го завршиме ова“, нагласи Зеленски.

Претседателите се согласија да одржуваат понатамошни контакти и да планираат идни состаноци.