Украинскиот претседател Володимир Зеленски денеска изјави дека рускиот претседател Владимир Путин е единствениот руски функционер со кој е подготвен да разговара и дека тоа ќе го направи само кога Украина ќе се договори за заеднички план со американскиот претседател Доналд Трамп и европските лидери.
Зборувајќи на конференцијата за безбедност во Минхен, Зеленски рече дека Трамп му го дал својот личен телефонски број и му рекол дека може да му се јави кога сака, пренесува Ројтерс.
„Мировниот договор може да биде само план за ставање крај на војната, за кој прво мора да се разговара и да се поддржи меѓу Украина и американскиот претседател. Улогата на безбедносните гаранции е исто така важна. На крајот на краиштата, ние зборуваме за безбедносни гаранции како главна точка во документот за завршување или прекинување на војната за Украина и за цела Европа“, нагласи тој, пренесува Укринформ.
Според него, Украина е веќе дел од Европа и ќе биде рамноправен дел од ЕУ.
Истакнувајќи ја важноста на улогата на Европа, тој потсети и на придонесот на Европејците во одбраната и хуманитарната поддршка дадена за време на војната, пренесува Танјуг.