Зеленски дава прст, Трамп сака цела рака: САД бараат и минерали и нафта и гас и пристаништа – новиот прелиминарен договор опфаќа сѐ

Договорот за економска „компензација“ што Вашингтон му го понуди на Киев вклучува повеќе од контрола на критичните минерали во земјата – тој опфаќа сè, од пристаништа и инфраструктура до нафта и гас, како и поголема база на ресурси во земјата.

Ова го пренесува британски Телеграф, повикувајќи се на нацрт-прелиминарниот договор.

Во него се наведува дека САД и Украина треба да основаат заеднички инвестициски фонд за да се осигураат дека „непријателските страни во конфликтот нема да имаат корист од обновата на Украина“.

САД ќе земат 50% од тековниот приход на Украина од екстракција на ресурси и 50% од финансиската вредност на „сите нови лиценци издадени на трети страни“ за идната монетизација на ресурсите. Ќе има „заложно право за такви приходи“ во корист на Соединетите Држави.

„Оваа клаузула значи „прво плати ни, па нахрани ги твоите деца“, изјави извор близок до преговорите, пренесе Телеграф.

Телеграф потсетува дека Зеленски самиот ја предложил идејата САД да имаат директен удел во украинските ретки земјени елементи и есенцијални минерали, но не очекувал дека ќе се соочи со услови кои вообичаено им се наметнуваат на државите агресори поразени во војна.

„Тие се полоши од финансиските санкции наметнати на Германија и Јапонија по нивниот пораз во 1945 година… Доколку законот беше усвоен, барањата на Трамп ќе сочинуваа поголем дел од БДП на Украина отколку репарациите наметнати на Германија според Договорот од Версај“, се наведува во написот.