Здравствениот дом во Илинден е во завршна фаза

Градежните активности за изградба на здравствен дом во Илинден се во завршна фаза.

Од Општина Илинден информираат дека со неговата изградба на граѓаните ќе им се овозможи широк спектар на здравствени услуги во местото на живеење, со што повеќе не ќе мораат да патуваат по дваесеттина километри за да ги задоволат своите здравствени потреби.

Градоначалникот на Општина Илинден, Александар Георгиевски истакна дека здравствениот дом на чие место пред повеќе од половина век се наоѓаше старата амбуланта, се гради по барање на жителите на Општина Илинден.

-Десетина години наназад едно од основните барања на граѓаните беше изградба на нов здравствен дом. Беше многу ветуван претходно, но не беше реализиран, па затоа на моја лична иницијатива како градоначалник се изработи нов проект и еве конечно се реализра. По завршување на изградбата Општината целосно ќе го предаде здравствениот дом на Министерството за здравство – изјави Георгиевски.

Новиот здравствен дом зафаќа бруто површина од околу 600 квадратни метри, се гради на два ката, со два влеза (преден и заден влез),а ќе има  две чекални, два шалтера, четири тоалети и 14 ординации. Во надворешниот дел ќе се обезбеди паркинг простор како и партерно и хортикултурно уредување.