„Зависноста, алкохолизмот и дрогата се грди зборови, но тоа е мојата реалност“

Поранешниот НФЛ-играч, Тери Таутоло, живееше сосема поинаков живот по кариерата. Од сè што изгради и спечали со годините, останаа само истите име и презиме. Од милионер стана просјак, но со несебична поддршка од луѓето од својата околина успеа да го најде вистинскиот пат, да се ослободи од бројните пороци и да започне нов, трет живот.

Некогаш беше победник на Суперболот. Секако, добро живееше бидејќи беше исклучително успешен и имаше милиони на сметката. Тој беше многу важен играч за својот тим, бидејќи играше во одбраната и беше одговорен за запирањето на нападот на противникот. Неговата физичка сила и посветеноста на работата беа на високо ниво. Сепак, големите успеси, очигледно, носат и големи последици. Останаа бројните повреди и потреси на мозокот, па така во 2012 година реши да се повлече од спортот на кој му даде толку многу. По пензионирањето, тој ѝ се посвети на една сосема друга страна од спортот – алкохолизмот и дрогата му беа излез од проблемите. Поради ова, неговите два брака се распаднаа, а врската со семејството целосно му прекина.

Беше јасно дека не може засекогаш да живее од заштедите во НФЛ и кога, конечно, остана без пари, почна да живее на улица. Така, неговите денови минуваа во потрага по храна и на засолниште, но, сепак, успеваше да го скрие животот од луѓето околу себе, претставувајќи им се како обичен бездомник.

Меѓутоа, оние што го знаеја неговиот претходен живот, не му дозволија да продолжи со ваквиот тек. Голем број спортисти, меѓу кои и неговиот поранешен тренер, Дик Вермеил, како и соиграчот Брент Бојд, му излегоа во пресрет и му обезбедија сместување и лекување. Благодарение на нив, тој успеа да ја надмине кризата, сега живее и работи во Света Моника, Калифорнија и ѝ се посвети на работата со децата со посебни потреби.

• Сега сум тука и благодарен сум за тоа. Зависноста, алкохолизмот и дрогата се грди зборови. Тоа е мојата реалност – истакна поранешниот НФЛ-играч.

Таутоло е роден на 30 август 1954 година, во Калифорнија. Кариерата ја започна во Филаделфија, но својот врв го достигна додека го носеше дресот на Сан Франциско, со кој го освои Суперболот во 1982 година. Подоцна играше за Детроит и за Мајами, но не успеа да го повтори успехот со ниту еден клуб и повторно да се искачи на врвот. Но, според статистиката, остави голем белег и придонес во своите тимови.