На 29 лица во Руанда им е дијагностицирана смртоносната вирусна болест Марбург, а 10 од нив починале, соопшти вчера Министерството за здравство на оваа источноафриканска земја. Сепак, вистински аларм денеска на социјалната мрежа Икс предизвика насловот на британскиот таблоид Сан, од кој можеше да се заклучи дека вирусот Марбург се шири во Белгија. Сепак, Светската здравствена организација (СЗО) ја демантираше веста, нагласувајќи дека сите се заразени во Руанда и дека на 29 септември се следат околу 300 нивни контакти.
„Еден контакт на заразеното лице отпатува во Белгија од Руанда. Претставниците на СЗО за ова ги известија јавните здравствени власти во Белгија“, се вели во соопштението на СЗО.
Марбург вирусната болест е слична на еболата, а е предизвикана од вирусот Марбург чиј природен домаќин е египетскиот овошен лилјак кој живее во африканските пештери. Луѓето најчесто се заразуваат во контакт со лилјаци или некои од животните кои исто така се подложни на овој вирус, како што се африканските зелени мајмуни. Во меѓучовечки контакт, вирусот се шири преку директен контакт (преку оштетена кожа или мукозни мембрани) со крвта, секретите, органите или другите телесни течности на заразените луѓе и со површини и материјали (на пр. постелнина, облека) контаминирани со овие течности. Периодот на инкубација е од два до 21 ден, а симптомите на инфекција се многу слични на оние на еболата: гадење, повраќање, дијареа, замор, болки во мускулите и зглобовите. Марбург вирусот предизвикува хеморагична треска, болест која се карактеризира со тешко крварење, откажување на органите, а во 88 проценти од случаите завршува со смрт. Нема одобрени вакцини или антивирусни третмани за лекување на болеста.
Министерството за здравство на Руанда во петокот на 27 септември прогласи епидемија на вирусна треска Марбург и веднаш воведе ограничувања за погребите на оние кои починале од смртоносниот вирус (за да се спречи физички контакт со починатиот во отворен ковчег, што е дел од тамошните обичаи) , а во меѓувреме посети на болници и на ученици во интернати. Околу 70 отсто од заразените се здравствени работници во две установи во Кигали, главниот град на Руанда. Случаи на инфекција се откриени и во три области кои граничат со Демократска Република Конго, Уганда и Танзанија. Тие земји имаат послаби здравствени системи и надзор од Руанда, така што се стравува дека Марбург веќе може да биде присутен во тие земји. Ова е прв пат Марбург вирусот да биде потврден во Руанда. Соседната Танзанија пријавила избувнување во 2023 година, додека три лица починале во Уганда во 2017 година. Од 1975 година, неколку епидемии на болеста се забележани во Јужна Африка, Кенија, Демократска Република Конго, Уганда, Ангола и Гвинеја.
Паника во Хамбург
На железничката станица во Хамбург, дел од платформата бил затворен неколку часа откако се посомневало за појава на опасниот вирус Марбург. Покрај тоа, во возот дошле луѓе во заштитни одела.
Како што дознава Билд, двајца патници од Руанда за време на патувањето развиле симптоми на треска. Станува збор за студент по медицина и неговата девојка. Како што се наведува, студент по медицина во Руанда бил во контакт со пациент за кој подоцна се покажало дека го има вирусот Марбург.
Засега нема докази дека овие патници се заразиле со вирусот Марбург.
