Застрашувачки климатски извештај: Планетата гори, а Европа се загрева побрзо од другите континенти

Европа е континентот кој најбрзо се загрева, предизвикувајќи екстремни временски настани, а поплавите низ цела Европа минатата година погодија најмалку 413.000 луѓе, се вели во извештајот за 2024 година на Службата за климатски промени Коперник и Светската метеоролошка организација.

Минатата година повторно беше најтопла досега во Европа, со рекордни температури во централниот, источниот и југоисточниот регион.

Бурите често беа силни, а поплавите беа широко распространети, а забележан е изразен климатски контраст помеѓу истокот и западот – екстремно суво и топло на исток, а топло, но влажно на запад.

„Овој извештај нагласува дека Европа е континентот кој најбрзо се загрева и доживува сериозни влијанија од екстремните временски услови и климатските промени“, рече Селесте Сауло, генерален секретар на Светската метеоролошка организација.

Документот, кој вклучува придонеси од околу 100 научници, дава низа загрижувачки податоци, како што е највисоката забележана температура на површината на морето, 0,7 степени над просекот во европскиот регион и 1,2 степени над просекот во Медитеранот, наведува RTVE. Овој индикатор е особено опасен бидејќи температурата на површината на морињата и океаните делува како гориво што го напојува атмосферскиот систем, што значи дека колку е потопла водата, толку повеќе пареа и енергија се ослободуваат во атмосферата, зголемувајќи ја јачината на бурите и екстремните настани.

„Во 2024 година, температурите низ Европа доживеаја значително зголемување, зголемувајќи го ризикот од топлотни бранови, тропски ноќи и шумски пожари“, вели Ана Кабре, климатски научник од Универзитетот во Пенсилванија.