Законот за работно ангажирање на лица ја помина првата фаза во Собранието 

Законот за работно ангажирање на лица предложен од ВМРО-ДПМНЕ, ја помина првата фаза во Парламентот. Со овој пропис се регулира начинот на воспоставување на работни ангажмани со или без прекини кои ќе имаат значајна улога за вклучување на одредени категории лица во рамки на формалната економија.

Тони Јаревски, пратеник од Пратеничката група на ВМРО-ДПМНЕ и коалицијата „Твоја Македонија“ истакна дека законот ќе придонесе за подобрување на севкупните економски односи, сузбивање на неформалната економија и подобра контрола на спроведување на трудовото законодавство.,

– Остварениот паричен надоместок на работно ангажираното лице, не влијае врз губење или остварување на права стекнати согласно прописите од областа на социјалната и детската заштита, старосна и семејна пензија, по основ на осигурување во случај на невработеност и невработените не се бришат од евиденцијата на невработени лица, студентите не ги губат правата стекнати по основ на посебните закони од образованието и на други права утврдени со посебни закони – истакна Јаревски.

Законот дава можност и заштита за ангажман и за средношколците односно за лица помлади од 18 години кои согласно општите прописи од работните односи ги исполнуваат условите за засновање на работен однос.

– Овој Предлог на Закон за работно ангажирање лица ќе ја поедностави постапката на работно ангажирање преку воведување на поедноставен систем за регистрација, кој ќе биде управуван од Агенцијата за вработување. Даноците и социјалните придонеси ќе се обработуваат и плаќаат преку системот кој го администрира Управата за јавни приходи, а важно за нашата држава е што јавните институции нема да подлежат на трошоци за надградба на информациските системи и обуката на јавните службеници – рече Јаревски.

Ова законско решение ќе ја поттикне фер конкуренцијата, осигурувајќи дека сите работодавачи ќе можат да ангажираат работници под исти услови, особено во периоди со зголемен обем на работа, создавајќи поинклузивен и подинамичен пазар на труд.

– Дополнително, оваа правна рамка ќе помогне во надминување на недостатокот од работна сила, ќе ја зајакне економската стабилност и ќе го подобри спроведувањето на мерки за работа со овие категории граѓани за јакнење на нивните вештини и капацитети правејќи ги конкурентни на пазарот на трудот – рече Јаревски и ги повика засегнати страни и сите кои имаат желба да допринесат со своите забелешки и размислувања да ги кажат на јавна расправа.