Заедничкиот час на студентите на Универзитетот „Св. Кирил и Методиј“ (УКИМ) беше прекинат откако на неколку студенти им се слоши, по што мораше да реагира Брзата помош.
Инцидентот се случи непосредно по почетокот на обраќањето на ректорката, кога стотици студенти се собраа пред универзитетот за да оддадат почит на жртвите од трагедијата во Кочани.
Дождот не ги спречи студентите да останат на собирот, кој започна со седумминутен молк точно напладне. Во текот на настанот, свое обраќање имаше и министерката за образование Весна Јаневска, која пред сè се заблагодари на студентите за нивното присуство.
Говорот на министерката беше прекинат, a pретседателот на УСС-УКИМ информираше дека се повикани неколку амбулантни возила за да им помогнат на студентите на кои им се слоши. Од Студентското собрание на УКИМ порачаа дека ова не е протест, туку собир кој треба да помине во мир и тишина, но дел од толпата продолжи со негодување. По овој развој на настаните, говорите не продолжија.
Претседателот на УСС-УКИМ најави дека собирите ќе продолжат во текот на целата недела, повикувајќи ги сите студенти да присуствуваат и да изразат солидарност.
