Вработените во Македонската филхармонија, вчера, преку протест упатија јавен апел до Министерот за култура и туризам, Зоран Љутков, да ги почитува законските одредби при изборот на директор на нивната институција.

„Нема да дозволиме нашата институција да биде жртва на бесрамни политички договори. Бараме Министерството за култура и туризам да го избере најдобриот кандидат на конкурсот за директор на Македонската филхармонија, односно Кандидатот кој ги исполнува сите услови од конкурсот: да има најмалку пет години работен стаж или искуство во културата, да биде истакнат културен работник со докажани референци, да приложи четиригодишна развојна програма и да поседува меѓународен сертификат за англиски јазик (B2)“, велат од СО Македонска филхармонија при СКРМ.

Оттаму побараа од Министерот за култура и членовите на комисијата за избор на директор, да се придржуваат до законската процедура и критериумите во конкурсот и со тоа да докажат дека системот на компетенции се почитува. Во спротивно, целата документација од постапката за избор, ќе биде побарана како информација од јавен карактер и споделена со јавноста“, истакнаа вработените во Филхармонија.

Од Министерството за култура и туризам, пак, посочуваат дека формираната комисија ќе ги разгледа петте пристигнати апликации на конкурсот и дека транспарентно ќе биде донесена одлуката, по што на министерот Зоран Љутков ќе му даде препорака кој од кандидатите ги исполнува сите услови за директор на оваа установа.

 

ИЗДВОЕНИ

ПОВРЗАНИ ОБЈАВИПОВЕЌЕ ОД АВТОРОТ