За една недела од Газа иселени 142.000 луѓе, Палестинците му се лутат и на Хамас

Откако Израел го прекина примирјето и ги продолжи воените операции, за само една недела од Појасот Газа се раселени 142.000 луѓе, изјави портпаролот на генералниот секретар на ОН, Стефан Дужарик.

-За само една недела 142.000 луѓе се раселени, а се очекува тој број да се зголеми, изјави тој, изразувајќи загриженост дека резервите со хуманитарна помош се намалуваат.

Дужарик потсети дека 90 отсто од населението на Појасот Газа веќе било раселено барем еднаш помеѓу 7 октомври 2023 година и стапувањето во сила на прекинот на огнот меѓу Израел и Хамас, на 19 јануари.

Примирјето е прекинато со израелските офанзивни акции на 18 март, а израелската војска соопшти дека оттогаш погодила 430 цели во Газа, објави „Ал Џезира“. Повторните израелски напади го навлекоа гневот на Палестинците и кон Хамас. Тие маршираа низ урнатините на уништените градови на северот на Газа и  извикуваа пароли против Хамас, што е редок израз на нивно јавно незадоволство, пренесува „Ал Џезира“.

– Армијата наскоро ќе изврши операции со максимална сила во областите на Појасот Газа, рече израелскиот министер за одбрана Израел Кац во средата, при обраќање до жителите на палестинската територија, додавајќи дека Хамас ги доведува во опасност животите на Палестинците.

Израелскиот премиер Бенјамин Нетанјаху претходно се закани дека Израел ќе окупира делови од Појасот Газа доколку Хамас одбие да ги ослободи заложниците што ги држи на палестинска територија.

-Колку подолго Хамас одбива да ги ослободи заложниците, ќе изгуби толку повеќе територија која ќе биде припоена кон Израел, рече тој.