За 31 милион евра Унгарија по 105 години повторно доби излез на море

Во првата фаза ќе се изгради крајбрежен појас во должина од 250 метри, кој потоа ќе се прошири за околу 400 метри, со што Унгарија ќе добие вкупно 650 метри крајбрежје на Јадранското Море. Дополнително, на располагање е и површина од 30 хектари, каде што ќе се изгради голем логистички центар, вклучувајќи објекти потребни за поморски операции, објави „Унгарија денес“.За крајбрежјето кое го зема со 60-годишен договор за концесија Унгарија плати 31 милион евра, а владата му ја довери задачата за развој на поморското пристаниште на „Адриа Порт“, трговска компанија во стопроцетна  сопственост на државата

Почна изградбата на унгарско пристаниште на Јадранското Море во Трст, што пред неколку дена го најави Левенте Маѓар, државен секретар на унгарското Министерство за надворешни работи и трговија, пренесува „Унгарија денес“.

Изградбата на унгарското пристаниште, кое треба да биде целосно оперативно до 2028 година, и ќе служи како центар за извоз на карго, почна со изградба на голем дел од морскиот ѕид и полнење на 50.000 кубни метри земја во северна Италија, изјави Унгарец на градилиштето.

Во првата фаза ќе се изгради крајбрежен појас во должина од 250 метри, кој потоа ќе се прошири за околу 400 метри, со што Унгарија ќе добие вкупно 650 метри крајбрежје на Јадранското Море. Дополнително, на располагање е и површина од 30 хектари, каде што ќе се изгради голем логистички центар, вклучувајќи објекти потребни за поморски операции, објави „Унгарија денес“.

Според Маѓар пристаништето во Трст ќе биде наменето за извоз на унгарски производи на партнери надвор од Европската Унија. Тој посочи дека Унгарија е 34. земја во светот по обем на извоз од 148 милијарди евра и додаде дека на недостигот на конкурентност на земјата директно влијае и немањето поморско пристаниште.

За крајбрежјето, кое го зема со 60-годишен договор за концесија, Унгарија плати 31 милион евра, а владата му ја довери задачата за развој на поморското пристаниште на „Адриа Порт“, трговска компанија во стопроцентна  сопственост на унгарската држава.

-Унгарија извезува товар во вредност од околу 60.000 милијарди форинти (150 милијарди евра) годишно, од кои најголемиот дел се транспортира по морски пат. Ако една земја нема сопствен пристап до море и пристанишни капацитети, таа секогаш ќе зависи од другите. Сакаме да ја промениме оваа ситуација бидејќи Унгарија, како 34. најголем извозник во светот, мора да има канали за да се поврзе со светските добавувачи на најефикасен начин со цел да создаде работни места, да ја зголеми ефикасноста на унгарскиот извоз и да им помогне на унгарските компании во нивниот бизнис“, рече Маѓар.

Тој потсети како Унгарија останала без излез на море по Првата светска војна.

-Јужнословенските трупи влегоа во Риека на крајот на 1918 година и оттогаш Унгарија нема пристап до море. Тоа сега ќе се промени, рече тој.

По Првата светска војна, со распадот на Австро-унгарската монархија, во Централна Европа се случија значајни територијални промени. Со Договорот од Тријанон во 1920 година, Унгарија изгуби приближно две третини од своето население и од териториите за кои сметаше дека ѝ припаѓаат. Пред распадот на монархијата, Унгарија имала пристап до Јадранското Море преку Риека. Сега повторно го добива, точно 105 години откако го изгуби, но на друга локација.