Настаните по митингот на Теразие не беа придонес за демократијата, туку потсмев и спроведување на малцинското насилство врз мнозинството, рече претседателот на Србија Александар Вучиќ во вчерашното обраќање до јавноста од Палатата Србија.
Тој оцени дека протестот се одвивал во демократска атмосфера, но дека по неговото завршување „се случи она што го очекуваа“.
Самиот собир се одвиваше во демократска атмосфера, што е многу важно за нашата земја, се беше како што треба во демократските земји. Меѓутоа, како што заврши собирот, се случија работите што ги очекувавме. Затоа што секој ден кога се заканувате има ситуација кога преовладува насилство, а тоа е извршување на тешки кривични дела. Заземањето на Прокоп, станицата во Нов Белград, запирањето на автопатот и работата на самиот мост Газела не беа придонес за демократијата, туку исмејување на демократијата како политички режим и спроведување на насилство и терор врз малцинството. Сакам да им честитам на полицијата и на сите наши сили за нивната толеранција, трпеливост, професионалност и почитување на сите права на оние кои не ги почитувале правата на другите луѓе, сосема спротивно од тоа како тоа се спроведува во другите земји во светот, рече Вучиќ во обраќањето.
Тој додаде дека запирањето на сообраќајот на железничките станици и патишта е „спроведување на насилството, волјата и теророт на малцинството врз мнозинството“.
Според него блокадите и протестите не се решение, туку разговор, додавајќи дека на разговор повикал и претставници на опозицијата, но тие не дошле. Вучиќ рече и дека ќе разговара со народот за стравот од ископ на литиум и со оние кои мислат поинаку.
„Јас само се борам за вистината и да разговараме. Ќе бидам најлошиот можен полицаец за Рио Тинто. Ќе бидам полош за нив од оние кои се борат против нив и сакаат да ја преземат власта без било каков избор’, рече Вучиќ.
Тој посочи дека може да разговара за референдумот, наведувајќи дека треба да се донесе одлука дали тој да се одржи на територијата на градот Лозница или на територијата на цела Србија. Само се плашам дека, каков глас и да има, секогаш ќе барате начини да го избегнете тоа“, рече Вучиќ.
Полицијата во неделата околу 5.30 часот ги растера учесниците на протестот против ископувањето на литиум од железничките станици „Белград центар – Прокоп“ и „Нови Београд“.
Министерот за внатрешни работи Ивица Дачиќ изјави дека полицијата интервенирала без употреба на присилни средства и дека нема повредени.
„Приведени се вкупно 14 лица поради постоење на основано сомнение дека сториле кривични дела, три поради сомнение за сторени прекршоци и две лица кои се странски државјани поради присуство на протестот во близина на најважните државни институции, “ изјави Дачиќ.
Како што подвлече, полицијата работи на идентификација на други лица.
Десетици илјади луѓе во саботата вечерта се собраа во центарот на Белград на протест против ископувањето литиум на повик на еколошки здруженија и движења. На протестот му претходеа собири на илјадници луѓе во педесетина градови и населени места низ Србија, откако на 1 август истече рокот од 40 дена што Алијансата на еколошките организации на Србија (СЕОС), еколошките движења и здруженија и ги дадоа на владата да го усвои законот.
Српскиот премиер Милош Вучевиќ ги нарече демонстрантите „кукавици и лажговци“ и на социјалната мрежа „Х“ им порача дека се „распадната банда“ и дека „отворено и монструозно му се закануваат на претседателот Александар Вучиќ со смрт“.
И вицепремиерот на Србија, Александар Вучин рече дека „опозицијата го сака сценариото на Мајдан во Србија“.
„Москва нè предупреди за подготовка на државен удар. Нема причина да се плашиме, имаме цврста и силна држава и претседателот Вучиќ не е Јанукович, тој нема намера да бега и да им ја предаде власта на насилниците. Но, имаме причина да бидеме претпазливи и многу сериозни“, рече тој.
Властите во Србија се соочуваат со сè пожесток отпор за ископувањето на литиумот, откако Белград на 19 јули потпиша меморандум за стратешко партнерство за одржливи суровини со Европската унија, што предизвика нов бран речиси секојдневни протести низ целата земја.
Српските власти тврдат дека рудникот за литиум ќе ја поттикне економијата и ќе донесе значителен раст на БДП, но еколозите тврдат дека цената би била превисока во споредба со немерливата штета за животната средина и локалната заедница во земјоделски развиената област Јадар на запад од земјата.
