Вучиќ: Заминувам во САД на почетокот на мај, можеби ќе разговарам со Трамп два или три пати

Српскиот претседател Александар Вучиќ изјави во Белград дека ќе ги посети САД на почетокот на мај, дека ќе се сретне со „сите најистакнати“ членови на владејачката Републиканска партија и дека верува дека ќе има можност да разговара со претседателот Доналд Трамп два или три пати, пренесе Бета.

Вучиќ вечерва за телевизијата Информер изјави дека добил покана да присуствува на состанокот на Републиканскиот национален комитет на почетокот на мај и дека има „конечна потврда“ за средби „со сите важни републиканци“.

„Верувам дека ќе се сретнам со сите истакнати републиканци. Мислам дека ќе имам можност да разговарам со претседателот Трамп најмалку два или три пати за два или три дена“, рече Вучиќ.

На прашањето дали ќе стане првиот српски лидер кој ќе се сретне со лидерите на САД и Русија за една недела, бидејќи оди во Москва на 9 мај, Вучиќ рече дека „нема конечна потврда“ за средбата со Трамп.

Вучиќ, исто така, рече дека „има идеја“ да организира „глобален форум со различни теми“ во Белград следната година, за што ќе побара поддршка од водечките светски лидери.

„Ќе побарам поддршка и од претседателот Трамп и од неговиот син Доналд Трамп помладиот и од претседателот (на Русија) Владимир Путин. Би сакал форумот да се одржи помеѓу март и мај, ќе ги замолам водечките светски лидери да ми помогнат да го организирам, а потоа ќе разговарам со други лидери“, рече Вучиќ.

Тој додаде дека Белград е „единствениот град“ кој би можел да биде домаќин и на Путин и на Трамп следната година, како и на италијанската премиерка Џорџа Мелони и идниот германски канцелар Фридрих Мерц „бидејќи никој друг не е способен да го стори тоа“.