Вучиќ: Поради пад на поддршката студентите се подготвуваат да го радикализираат протестот

Претседателот на Србија, Александар Вучиќ денеска оцени дека има „значителен пад на поддршката“ за протестите што се одржуваат низ цела Србија и дека „сега треба да дојдат од цела Србија на едно место за да направат големи случувања“, како што е случајот денеска во Ниш.

Тој порача и дека „нема да дозволи власта да се бира на улица додека е жив“.

„Се разбира, следи радикализација, бидејќи кога ќе забележите пад на поддршката, треба да одите во екстремизам и да правите погрешни работи: да ги напаѓате луѓето кои мислат поинаку, да одите на наводно освојување институции и сите други незаконски работи“, рече Вучиќ.

Како што додаде тој, на оние што протестираат „им снема трпение и ќе побрзаат со такви акции“.

„На крајот на краиштата, ова има една добра работа: и покрај тоа што е многу лошо затоа што некој сакаше да изгради нов украински Мајдан, ако го направи тоа што е можно поскоро, тогаш тоа ќе престане и ќе заврши што е можно поскоро“, рече Вучиќ.