Вселенскиот отпад може да доведе до катастрофа – 1,2 милиони објекти летаат над нашите глави, предупредува Европската вселенска агенција

Вселенскиот отпад околу нашата планета се трупа толку многу што некои орбити наскоро може да бидат неупотребливи. Покрај тоа, 1,2 милиони објекти поголеми од еден сантиметар лебдат над нашите глави и се доволно големи за да предизвикаат катастрофални штети. Тоа е предупредувањето од последниот извештај на Европската вселенска агенција (ESA).

– Нашата планета е опкружена со вселенски летала кои вршат важни задачи како што се проучување на климатските промени, воспоставување глобални комуникации и навигација, помагајќи ни да одговориме на важни научни прашања. Но, некои орбити во вселената стануваат пренатрупани и имаат зголемен број смртоносни, брзи фрагменти од поранешни сателити и ракети кои ја загрозуваат нашата иднина во вселената, се вели во соопштението на ЕСА.

Канцеларијата за вселенски отпад на ESA објавува Извештај за состојбата на орбитата од 2017 година за да обезбеди транспарентен преглед на вселенските активности.

– Од почетокот на вселенската ера, отсекогаш имало повеќе отпад во орбитата отколку оперативни сателити. Бидејќи вселенскиот отпад претставува проблем за животната средина на Земјата на глобално ниво, само глобално прифатено решение може да биде одговор на тоа, се наведува во извештајот.

Некои од главните заклучоци на извештајот се дека орбитата е ограничен ресурс, дека сателитите кои остануваат во орбитата по завршувањето на нивната мисија се опасност, дека бројот на комерцијални сателитски соѕвездија во ниска орбита се зголемува од година во година, дека сателитски или ракетни остатоци повторно влегуваат во атмосферата на Земјата повеќе од три пати на ден.

– Дури и без нови лансирања, количината на вселенски отпад ќе продолжи да расте бидејќи фрагментацијата ги додава предметите побрзо отколку што природно се враќаат во атмосферата. За да се спречи оваа верижна реакција, позната како Кеслеровиот синдром, која се заканува да направи некои орбити неупотребливи, неопходно е активно отстранување на овој отпад, наведе ЕСА.

Во орбитата има околу 130 милиони објекти со големина меѓу еден милиметар и еден сантиметар.

– Има околу 1,2 милиони отпадоци поголеми од еден сантиметар, што ги прави доволно големи за да предизвикаат катастрофални штети, додека дури 54.000 предмети се поголеми од 10 сантиметри. Научниците набљудуваат околу 40.000 објекти во вселената, од кои 11.000 се активни, предупреди ЕСА.