Портокалов аларм поради невремето Дара е издаден за Франција, поради закана од силен ветер, снег и мраз, а поради најавените временски услови ќе се одржи свеченото отворање на реновираната париска катедрала Нотр Дам внатре во зградата.
Француската метеоролошка служба денеска предвидува силни налети на ветер во главниот град, а попладне врнежи од дожд пропратени со ветрови со брзина поголема од 70 километри на час, поради што вечерашната музичка програма по повод отворањето на катедралата ќе биде изменета, а најавениот свечен концерт ќе се одложи, јавува телевизијата БФМ.
Вкупно 15 провинции се под готовност, од кои девет на северозападниот брег и уште две на југоисточниот дел поради силниот ветер, додека четири на југозапад се ставени во состојба на готовност поради снег и можни лавини.
Девет провинции во северозападна Франција, меѓу кои и Ла Манш, Сен Маритим и Па де Кале, меѓу другите, се ставени под портокалов аларм поради силните ветрови.
Поради силните ветрови, Француските железници соопштија дека услугите на регионалните железнички линии ќе бидат целосно прекинати за викендот, а услугите на некои линии во Бретања, Нувел-Аквитанија и регионот Лоара ќе бидат одложени или изменети.
На југозападниот дел на Франција, во четири провинции е вклучен портокалов аларм поради снег и мраз.
Метеоролозите сметаат дека вкупната количина на снег ќе достигне и до метар и половина на планините.
На пониските места, од околу 800 метри, се предвидува снег меѓу 15 и 30 сантиметри, додека на повисоките од 1.200 до 1.400 метри, снегот може да достигне висина од 70 сантиметри до еден метар.
Овие снежни врнежи придружени со силен ветер може да предизвикаат опасни снежни наноси и да го зголемат ризикот од лавини во регионот, посочуваат метеоролозите.
Метеоролозите предупредуваат дека откако ќе помине невремето Дара, ќе следи многу нестабилно време, со обилни врнежи од дожд во текот на попладневните часови, што ќе го зголеми ризикот од дополнително тешко време.
