Во балканското шоу „Никогаш не е доцна“ Италијанецот Матиа Заната капитулира пред Македонецот Зоран Рудан-Цеки  

Таков музички натпревар досега немаме видено!

Дланките гореа, а срцата трепереа и тоа цело време додека одеше повеќечасовното шоу со најголемата гледаност „Никогаш не е доцна“ (Никад није касно). А, во неодамнешното викенд-издание, главниот збор со својот настап го имаше нашиот Македонец Зоран Рудан, со прекарот Цеки. Победата ја однесе во многу остра конкуренција. Настапи во дуел со познатиот Италијанец Матиа Заната, кој инаку со години живее и пее во Србија, оженет е за Србинка, но сепак неговата татковина е Италија, во која е роден.Италијанецот прекрасно ги пее италијанските канцони, впрочем тоа се негови песни, таму е и израснат како дете. Под топлото сонце на Италија, Медитеранот, крај морските бранови и нејасно би било да не знае да ги пее. Покрај тоа што доби огромен број гласови и што за многу девојки и жени им изгледа привлечно, сепак, Заната капитулира пред македонскиот естраден вулкан, Зоран Рудан-Цеки. Тој  ја однесе победата и со тоа стави точка на дилемата која висеше во воздухот за време на шоуто: Дали Македонија ќе ја надмине Италија?

Македонецот и овој пат настапи со песна од репертоарот на популарниот бенд „Бијело дугме“, групата којашто најмногу ја сака. По примерот на „Бијело дугме“, Цеки во Скопје има свој македонски трибјут-бенд „Бело копче“, со кој редовно настапува низ македонските дискотеки и ноќни клубови. Зоран е роден во Скопје, а на својот сакан роден град му има посветено повеќе песни препознатливи по скопски жаргон: „Џабе живиш у Скопје“, „Касно лето е во Скопје“, „Поштарот Петре“ и „Цепај, сине“.   (Д.М.)