Во паркот „Авионче“ во Ново Лисиче, утре со почеток во 11 часот, ќе се одржи настанот „Вкуси ја традицијата преку домашна здрава храна“ со поддршка на Министерството за земјоделство, шумарство и водостопанство.
На настанот ќе учествуваат над 300 излагачи и над 50 здруженија, федерации, индивидуални земјоделци кои ќе го промовираат нивниот домашен производ.
Овој настан го организира здружението „Винотек“, а како помагатели на настанот се јавуваат и Организацијата за храна и земјоделство на ООН – FAO, Постојаната работна група за регионален рурален развој – SWG RRD, Швајцарската програма за зголемување на пазарната вработливост – ИМЕ и Германското Сојузно Министерство за економска соработка и развој на Германија (BMZ), имплементирано од германското друштво за интернационална соработка (GIZ) и проектот за поддршка на диверзификација на економски активности во Југоисточна Европа.
В недела, пак, непрофитната компанија која управува со отпад од пакување и соработува со компании од голем број индустрии, „Еуро-Екопак“, заедно со Oпштина Аеродром, во 12 часот, исто така ќе организираат настан во паркот „Авионче“ во Скопје.
Активноста е дел од проектот „CleanAirDrom“ и фокусот ќе биде ставен на собирање на отпадно стакло (шишиња, тегли итн.) за што ќе биде поставена соодветна опрема. Воедно, посетителите ќе може да уживаат и во настапите на: дуото ДНК, детскиот хор „Поточиња“ и танц групата „Аква денс“.
Проектот „CleanAirDrom“ го реализира Општина Аеродром, а „Еуро-Екопак“ се вклучува како поддржувач и во рамки на активностите, поставени се машини за собирање пластични шишиња во девет училишта и две градинки. Секое шише има своја вредност и како директна субвенција се доделува на училиштето, односно на градинката во даден временски период, а врз основа на предодредена програма која општината ќе ја донесе за таа цел.
Имајќи предвид дека во општина Аеродром има 77.000 жители, над 2.500 деца во градинките и над 7.000 ученици во основните училишта, проценките се дека на годишно ниво можат да се обезбедат и до 1,3 милиони денари за 11 училишта и градинки преку овој пилот-проект. Колку повеќе се селектира, толку повеќе се донира за овие институции.
Проектот „Clean AirDrom“ е финансиран од Европската Унија, кофинансиран од Швајцарската агенција за поддршка и развој преку Министерството за локална самоуправа. „Еуро-Екопак“ веќе планира и голем број на други активности за подигање на јавната свеста во насока на почиста животна средина.
