Ветуваа бесплатен превоз, а останавме и без автобуси!

Уредувањето, обновата и воведувањето пристоен градски превоз, каков што заслужува една метропола, отсекогаш биле главен адут за добивање политички поени кај сите досегашни претенденти за градски татковци. Приказната, сите децении наназад, беше иста: два чекори напред – три назад. Но, искрата надеж стигна со жената што отиде подалеку, па вети бесплатен јавен градски превоз. И Данела Арсовска ги доби симпатиите. Но, и таа не го исполни ветувањето, а граѓаните се соочија со хаос и со доцнење на автобусите. Не само што не добија бесплатен јавен градски превоз туку останаа и без оној „каков-таков, никаков“. Нема граѓанин што нема да се пожали дека чека дури и по еден час, некогаш и повеќе, на автобуските постојки и на температури под нулата, но и на +40. Недостигаат автобуси за да може да се почитува возниот ред, а и оние што ги има, ако имаат гориво, или се расипуваат среде пат или често пати се запалуваат. Скопјани дигнаа раце, се навикнаа, така што и најавата за нови 120 еколошки автобуси не ги израдува 

Јавниот градски превоз отсекогаш бил главен адут за добивање политички поени кај сите оние што претендирале досега да станат градоначалници на Град Скопје. Таков беше случајот и со актуелната скопска градоначалничка, Данела Арсовска, која во предизборието ветуваше бесплатен јавен градски превоз. Наместо тоа, граѓаните се соочија со хаос и со доцнење на автобусите. Не само што не добија бесплатен јавен градски превоз туку речиси и да не добиваат никаков. Чекаат по час, некогаш и повеќе, на автобуските постојки и на температури под нулата, но и на +40.

Недостигаат автобуси за да може да се почитува возниот ред, а и оние што ги има, или се расипуваат среде пат или често пати се запалуваат. Јавното сообраќајно претпријатие „Скопје“ минатата година се соочи и со недостиг од нафта, поради што автобусите се паркираа во своите бази, а циркулираа триесетина. Поради тоа, неколку недели беше попречено нормалното функционирање на претпријатието, па мораше да се интервенира со 250 тони нафта од државните резерви.

За да биде трагедијата поголема, политичките игри и интереси што се одвиваат врз грбот на скопјани доведоа до тоа и да не може да се купат нови еколошки автобуси. Градските советниците од ВМРО-ДПМНЕ сиве овие години не гласаат за одлуката со која треба да се набават нови автобуси. Ниту се прифаќа проектот за БРТ, кој би им овозможил на граѓаните многу побрзо, удобно и комотно да стигнат од една до друга дестинација и за кој веќе има одобрено средства, средства во кои е пресметана и набавката на 60 еколошки автобуси.  Образложението беше дека по трасата на булеварот „Партизански одреди“ поминува главната водоводна цевка, а и сечењето многу дрвја. Инаетот и политичката препирка меѓу скопската градоначалничка и советниците на ВМРО-ДПМНЕ најмногу ги почувствуваа скопјани, бидејќи не можеа навреме да стигнат на работа, на училиште, но и на лекар.

Приватните превозници, пак, се приказна за себе. Тие бараа  да им се исплатат средствата што им ги должеше Градот, односно ЈСП, за изминат километар. Поради тоа, штрајкуваа, за на крајот да побараат зголемување на цената за изминат километар. Советот на Град Скопје прифати тоа да биде за 20 денари. 

Јавниот автобуски превоз во Скопје повторно се актуализира пред локалните избори. И повторно најава за набавка на 120 нови еколошки автобуси. Поради сите овие случувања, граѓаните се сомневаат дека ветувањата се празни и само за добивање политички поени.

Од „Зелен хуман град“ го поздравуваат усвојувањето на информацијата на Владата за набавка на 120 еколошки автобуси, бидејќи ќе се спроведе таа со средства од буџетот, не се задолжува државата и не подига кредит за нивна набавка. Но, сметаат дека е неисправно што се прави ова дури во април, четвртиот месец од годината, а државниот буџет беше донесен уште на крајот од минатата година и тогаш се знаело дека има доволно финансии за да се набават нови автобуси.

– Не ни се допаѓа што може да се користи оваа одлука, донесена на овој начин, за собирање политички поени и гласови на следните локални избори и не сметаме дека една партија што му мисли добро на нашето општество, треба да функционира на овој начин, односно да користи моменти во предизборна кампања за, конечно, да обезбеди функционирање на еден суштествен сегмент од нашето општество како што е јавниот превоз – реагираат од „Зелен хуман град“.

Втората причина зошто ја поддржува „Зелен хуман град“ одлуката на Владата е, како што велат, неопходноста од редовна обнова на „флотата“ на ЈСП.

– Град Скопје имаше реален проблем со јавниот превоз целиот изминат период, дел од тој проблем беа вештачки создадените кризи, кои беа производ на меѓупартиските пресметки, а дел од тоа беше и реален недостиг на финансии на претпријатието, недостиг на соодветен кадар што соодветно ќе раководи со него, проследено со борби внатре, во самото претпријатие, бидејќи има силна партизација меѓу вработените, и не само во ЈСП туку и во сите јавни претпријатија, и на локално и на централно ниво. И едноставно не гледаме како може да продолжи понатаму ваквото функционирање на Македонија кога се користат основните потреби на граѓаните како механизам за подмитување и купување гласови за локални или за централни избори – децидни се од „Зелен хуман град“.

Оттаму додаваат дека во ваквите меѓупартиски пресметки и борбата на различни политички групации во рамките на Советот за кој да ги земе поените за нови автобуси и функционален јавен превоз, секогаш жртва ќе бидат граѓаните.

– Не се мисли на најдобрите решенија за нивните проблеми, туку се мисли на личниот углед и слика во јавноста, односно популизмот и опциите за што повеќе гласови, што повеќе функции и што повеќе приграбување моќ – сметаат од „Зелен хуман град“.

Владата, на седницата што се одржа во вторникот, ја усвои информацијата за набавка на 120 еколошки автобуси, од кои 80 ќе бидат наменети за ЈСП, а 40 ќе им бидат, во оваа првична фаза, распределени на другите сообраќајни претпријатија во општините во кои има организиран јавен градски превоз.

Мицкоски истакна дека Владата прави чекор напред во обезбедувањето чист воздух и пристојна животна средина за граѓаните.

– Тоа што е важно е што нема да има загадување итн., нешто што им е очајно потребно на граѓаните, особено во текот на грејната сезона. Затоа правиме чекор напред во таа насока. Но, тоа е процес што бара многу време. Доколку седиме и гледаме дека си минува времето, ништо не правиме, не сме проактивни, туку сме реактивни и тогаш нема да дојдеме до решение. Затоа ние сакаме да бидеме проактивни, да нудиме политики, да креираме политики и да дојдеме до нашата цел, а тоа е пристојна, убава животна средина за нашите сограѓани – нагласи Мицкоски.

(А. П.)