Ветеринарно сточарскиот центар Куманово, апелира до сопствениците за одговорно чување на милениците, бидејќи има случаи цели легла да се исфрлаат по околината на Куманово.
– На годишно ниво запловуваме од 130 до 150 кучиња во градот. Делумно успеваме да го намалиме бројот на кучиња скитници. Но, овој проблем не се решава на овој начин. Основен проблем не се финансиите и екипите што заловуваат. Главен проблем е несовесното однесување на сопствениците. Ваквиот закон за благосостојба на животните е веќе надминат. Целта кога се проектираше беше да се заловат, стерилизираат да се вратат кучињата. Во изработката учествуваше експерт од Англија. Ваквиот начин покажа ефект во развиените земји, но кај нас нема некој ефект – изјави ветеринарот Зоран Пешевски.
Според него, немало контрола на популацијата.
– Многу е важно да се крене свеста за вдомување на животните. Кучињата на улиците се огледало на нашето општество, велат граѓаните кои посочуваат дека се потребни ригорозни санкции за оние кои ги напуштаат милениците и исфрлаат легла во околината на градот – потенцира Пешевски.
Ветеринарно-сточарскиот центар „Тодор Велков“ Куманово, освен во Куманово заловува кучиња во други општини каде состојбата не е ништо подобра.
– Како човек од фелата на тркалезна маса која ќе се одржи во Скопје кон крајот на ноември, заедно со повеќе чинители, локални, државни власти, граѓански организации и ќе ги наведеме овие проблеми за да најдеме соодветно решение – рече Пешевски.
За ветеринарите важни се ригорозни мерки против неодговорните сопственици, формирање на таканаречена „ветеринарна полиција“, чести контроли на инспекторите, но важно е да се чипираат кучињата.
– Според мои податоци има околу 180 до 220.000 илјади регистрирани кучиња на ниво на земјава. Во сто заловувања има по едно, најверојатно куче кое се одалечило од домот, што секому може да се случи, веднаш се враќа на сопственикот – изјави Пешевски.
Тој изрази сомнеж и за бројот на каснувања од кучиња.
– Или луѓето ги малетретираат или лажно пријавуваат и системот не проверува, многу ретко се агресивни кучињата. Од мое искуство има во една фамилија тројца каснати, или лице кое секое година е каснато од куче скитник – изјави Пешевски.
Според него, заловените и вратените кучиња се социјализирани и не напаѓаат.
