Учениците боеја хранилки за птици, учествуваа во едукативни квизови и решаваа тестови

Од Општина Ѓорче Петров велат важно е да се разбере дека грижата за животната средина не е само одговорност на институциите, туку и на сите нас, заедно со нашите деца, кои ќе бидат носители на промената во иднината

Учениците од ООУ „Димитар Поп Георгиев Беровски“ (од четврто до седмо одделение) имаа можност да учествуваат во забавни и едукативни активности кои се дел од големиот проект на ЕУ – EU4Clear Air Project, имплементиран од UNOPS за подобрување на животната средина.

– Нашите најмлади учествуваа во: боење на хранилки за птици, изработка на еко-систем во тегла, садење дрвја, едукативни квизови и во решавање тестови. Овие активности не се само забавни, туку и многу значајни за едукацијата на нашите деца во однос на важноста за здрава животна средина, чист воздух и квалитетен биодиверзитет. Особено важно е Општина Ѓорче Петров да биде дел од овие настани, бидејќи само преку заеднички напори можеме да создадеме поеколошки свесно општество, во кое ќе се грижиме за квалитетот на воздухот, почвата и природата околу нас – велат локалната самоуправа.

Од Општина Ѓорче Петров додаваат дека важно е да се разбере дека грижата за животната средина не е само одговорност на институциите, туку и на сите нас, заедно со нашите деца, кои ќе бидат носители на промената во иднината.