Учениците од јавните училишта ОУ „Коле Неделковски“, ОУ „Јохан Хајнрих Песталоци“ и ОУ „Кочо Рацин“ учествуваа на работилницата „Upcycling“ (за надградба), организирана од Одделението за комерцијални и економски прашања на Амбасадата на Грција во Северна Македонија и од грчката невладина организација „Catwalk “ во Скопје, на 23-24 септември.
Работилницата „Upcycling“ се фокусираше на одржливата и етичката мода и на циркуларната економија.
Учениците научија за влијанието на модната индустрија врз животната средина, како и за можностите за повторна употреба на облеката и заштита на животната средина. Во практичниот дел од работилницата, тие ги покажаа своите креативност и вештини за соработка, претворајќи стари маички во чанти, со што им дадоа нов живот на старите предмети.
