Убиството на Насрала е катастрофален удар за Хезболах

33
EPA-EFE/AHMED JALIL

Либанецот Сајед Хасан Насрала, кој беше убиен во израелски напад во петокот, го предводеше Хезболах низ деценискиот конфликт со Израел, надгледувајќи ја неговата трансформација во воена сила со регионално влијание. Тој стана една од најистакнатите арапски личности во последните децении – со поддршка на Иран.

Неговата смрт е катастрофален удар за Хезболах, кој се соочува со драматична ескалација на израелските напади. Тоа е и голем удар за Иран, со оглед на клучната улога што ја одигра во регионалната „оска на отпор“ поддржана од Техеран.

Хезболах ја потврди смртта на Насрала, кој ја предводеше групата 32 години. Хезболах во соопштението рече дека ќе ја продолжи борбата против Израел „во поддршка на Газа и Палестина и во одбрана на Либан и неговиот непоколеблив и чесен народ“.

Израелската војска претходно соопшти дека Насралах бил елиминиран во „целен напад“ во петокот врз подземниот штаб на групата под станбена зграда во Дахиех, јужно предградие на Бејрут контролирано од Хезболах.

„Армијата го елиминираше… Хасан Насрала, водачот на терористичката организација Хезболах“, напиша портпаролот на израелската војска Авичај Адрае на мрежата Х.

Ројтерс пишува дека поддржувачите ќе го паметат Насрала по тоа што се спротивстави на Израел и им пркосеше на САД. За неговите непријатели, тој беше водач на терористичка организација и посредник на шиитската исламистичка теократија на Иран во борбата за влијание на Блискиот Исток.

Неговото регионално влијание беше видливо за време на речиси едногодишниот конфликт предизвикан од војната во Газа, кога Хезболах се вклучи со истрелување ракети кон Израел од јужен Либан за поддршка на својот палестински сојузник Хамас. Неговиот пример го следеа јеменските и ирачките групи кои дејствуваат под капата на „оската на отпорот“.

„Ни претстои голема битка“, рече Насрала во говорот на 1 август на погребот на главниот воен командант на Хезболах, Фуад Шукр, кој беше убиен во израелски напад врз јужните предградија на Бејрут, контролирани од Хезболах.

Одговарајќи на нападите врз комуникациската мрежа на Хезболах во говорот на 19 септември, Насрала вети дека ќе го казни Израел.

Израел, во меѓувреме, драматично ги засили своите напади, убивајќи неколку високи команданти на Хезболах во целни напади и започна масовно бомбардирање на областите на Хезболах во Либан, при што загинаа стотици луѓе.

Неколку часа откако милитантната група Хезболах, сојузничка на Иран, потврди дека нејзиниот водач, Хасан Насрала, е убиен во масовен израелски воздушен напад, насилството повторно се разгоре. Сирени се огласија во Тел Авив, а израелските сили продолжија да погодуваат цели во Бејрут и во јужен Либан.

Израелската војска соопшти дека сирените за воздушен напад се активирале на аеродромот во Тел Авив додека премиерот Бенјамин Нетанјаху се враќал од Соединетите Држави по неговиот говор во Обединетите нации, при што официјални лица велат дека биле пресретнати проектили истрелани од јеменските бунтовници Хути поддржани од Иран.

Не е познато дали ракетниот напад конкретно бил насочен кон Нетанјаху, кој го прекина своето патување со САД поради последното насилство, кое се интензивираше на 27 септември кога Израел започна масовен напад врз јужен Либан, при што беа убиени Насрала и неколку други водачи на Хезболах, организација означена како терористичка од САД.

Израелските сили на 28 септември продолжија со воздушните напади на локациите за кои рекоа дека се сместени команданти и оружје на Хезболах, вклучително и, како што рекоа, „прецизен напад“ на локација во Бејрут.

Со помош на Иран, Хасан Насрала го претвори Хезболах во моќен политички и воен ентитет во Либан и главен регионален играч. Хезболах вети дека ќе ја продолжи својата борба против Израел и покрај смртта на неговиот долгогодишен лидер, при тоа не даде никакви индикации за тоа кој би можел да го наследи Насрала.

Американските власти рекоа дека не биле информирани пред нападите од блискиот сојузник Израел и дека немале никаква улога во акцијата.

Американското Министерството за одбрана соопшти дека секретарот Лојд Остин му рекол на израелскиот колега Јоав Галант дека САД се решени да ги спречат Иран и групите поврзани со Иран да ја искористат ситуацијата во Либан или да ги прошират непријателствата. Портпаролот на Пентагон, Патрик Рајдер, рече дека Остин изразил целосна поддршка за правото на Израел да се брани и „јасно стави до знаење дека Соединетите Држави остануваат посветени да ги заштитат американските сили и објекти во регионот и во одбраната на Израел“.

Москва, во меѓувреме, го осуди убиството на Насрала, а Министерството за надворешни работи го означи како „уште едно политичко убиство“.

„Оваа насилна акција е полн со уште поголеми драматични последици за Либан и за целиот Блиски Исток“, се вели во руската реакција.

Американскиот претседател Џо Бајден изјави дека убиството на лидерот на либанската група „Хезболах“, Хасан Насрала од страна на Израел, е мерка за спроведување правда за неговите многубројни жртви и рече дека САД целосно го поддржуваат правото на Израел да се брани од групите поддржани од Иран.

Бајден посочи дека му наредил на секретарот за одбрана Лојд Остин дополнително да ја зајакне одбранбената позиција на американските воени единици на Блискиот Исток за да се одврати агресијата и да се намали ризикот од ескалација на војната.