Уапсен романскиот претседателски кандидат/ВИДЕО

Келин Георгеску, фаворит на проруското крило на романската претседателска трка, денеска беше приведен на сослушување во врска со минатогодишните избори кои беа поништени по наводната операција на руско влијание.

Неговата официјална страница на Фејсбук објави дека Георгеску бил запрен во сообраќајот и одведен во Јавното обвинителство токму во моментот кога требало да поднесе нова кандидатура за претседателските избори.

„Системот го запре во сообраќајот и го однесе на распит! Каде е демократијата, каде се партнерите кои треба да го бранат?“ стои во соопштението.

Романските медиуми објавија дека обвинителите издале налог за апсење и ги претресуваат просториите на неговите соработници, вклучително и водачот на платеничката група, Хорациу Потра, и телохранителот на Георгеску.

Călin Georgescu în cârje adus la Parchetul General.

România stat polițienesc. pic.twitter.com/784Szlcm7L

— Dacian Romulus (@dacianromulus) February 26, 2025

Инспекторите го испитуваат финансирањето на неговата кампања минатата година, а во официјалното соопштение наведуваат дека истражуваат 27 лица за дејствување против уставниот поредок, јавно поттикнување насилство и основање фашистичка организација. Георгеску не е конкретно именуван, но апсењето доаѓа откако неговите соработници биле поврзани со овие наводи.

Романија западна во политичка криза кон крајот на минатата година, откако Георгеску победи во првиот круг од претседателските избори и требаше да се соочи со реформистката Елена Ласкони во вториот круг. Сепак, Уставниот суд ги поништи изборните резултати поради сомневање за руско влијание врз исходот од гласањето.

Новите претседателски избори се закажани за 4 мај, додека вториот круг е закажан за 18 мај. Георгеску тврди дека апсењето и истрагата се обид да се спречи повторно да се кандидира.