Иновации во тутунската индустрија, производството на брендови на ФМИ за потребите на над девет странски пазари, финансиска консолидација на ТКП, зголемена ефективност и продуктивност се само дел од придобивките од 10 годишното партнерство помеѓу Филип Морис Интернешнл (ФМИ) и Тутунски Комбинат Прилеп (ТКП). Ова партнерство донесе голем број придобивки за локалната заедница и за Македонија, поставувајќи ја земјата на мапата на инвестиции на гигантот во тутунската индустрија. Брендовите кои се произведуваат во ТКП се извезуваат на девет пазари, меѓу кои и земји од ЕУ а во подготовка е уште еден, истакна премиерот Христијан Мицкоски по посетата на прилепскиот Тутунски комбинат.
– Десетгодишното партнерство меѓу ФМИ и ТКП е пример за позитивното влијание што силните меѓународни соработки можат да го имаат врз економијата и заедницата. Заедничките напори не само што ги унапредија нашите индустриски капацитети, туку создадоа и нови можности за тутунскиот комбинат кој успеа од загубар да стане профитабилна компанија – рече Мицкоски.
Соработката на компаниите резултира со позитивни резултати врз економијата, воедно овозможувајќи имплементација на напредни производствени процеси и инвестиции во најсовремена опрема.
– Навистина сме задоволни од постигнатото со ТКП во изминатата деценија. Заедно направивме голема промена во работата на ТКП и поставивме нови стандарди во индустријата во Македонија. Покажавме дека во Македонија имаме вистински партнер и дека оваа соработка ќе се продлабочува. Нашето партнерство е изградено врз меѓусебна почит, споделени вредности и заедничка визија за иновации и напредок – изјави Иван Костиќ генерален директор на ФМТКП.
За ТКП ова партнерство донесе стабилност на Комбинатот и влијае позитивно на локалната заедница.
– Одбележувањето на десет години соработка со ФМИ е значаен јубилеј за нас. Ова партнерство ни овозможи да ги подобриме нашите производствени капацитети, да усвоиме најсовремени технологии и да ги подигнеме нашите оперативни стандарди. Благодарни сме за поддршката и со нетрпение очекуваме многу повеќе години заеднички успех – изјави Министерот за земјоделство, шумарство и водостопанство, Цветан Трипуновски.
– Среќни сме на оваа соработка и се надеваме дека ќе се продлабочи и во следните години и ќе донесе до уште поголеми резултати, за унапредување на работата на комбинатот но и за локалната заедница – истакна Александар Алексовски, генерален извршен директор на Тутунски комбинат Прилеп.
(С.Бл.)
