Туск го потсети Трамп дека ЕУ е создадена за да обезбеди мир, но и фер трговија

Полскиот премиер Доналд Туск денеска му порача на американскиот претседател Доналд Трамп дека Европската унија (ЕУ) не е создадена за да „игра и да измами некого“, туку да обезбеди мир, почитување меѓу народите и да гарантира слободна и фер трговија.

„Европската унија не е формирана за да измами некого. Сосема спротивно. Таа е основана за да го одржи мирот, да изгради почит меѓу нашите народи, да создаде слободна и фер трговија и да го зајакне нашето трансатлантско пријателство. Колку и да е едноставно“, рече Туск.

Европската комисија му одговори на Трамп дека е подготвена решително и итно да реагира на сите бариери што тој ќе ги постави за слободната трговија.

Претходно, американскиот претседател зборуваше за потребата од усвојување царини за земјите од ЕУ, нагласувајќи дека, според него, ЕУ е основана со цел да ја поткопа американската економска сила и моќ.

„Ги сакам европските земји. Видете, ајде да бидеме искрени. Европската унија беше формирана за да ги „зезне“ Соединетите Американски Држави. Тоа е целта на тоа, и тие го направија тоа добро“, рече Трамп.

На прашањето за можните одмазднички тарифи од страна на ЕУ за американски стоки, американскиот претседател рече дека не е загрижен.