Трамп наметна царини и на остров на кој живеат само пингвини

Австралиската надворешна територија на островите Херд и Мекдоналд, населена со пингвини, но не и луѓе, исто така е погодена од строгите американски царини што ги објави претседателот Доналд Трамп во средата.

Но, таа група острови во близина на Антарктикот не е единствената необична територија вклучена во списокот на Белата куќа за нови „реципрочни царини“.

Островот Норфолк во јужниот дел на Пацификот, друга австралиска надворешна територија, е погоден со царини од 29 отсто, 19 отсто повисоки од Австралија. На крајот на краиштата, во Норфолк живеат луѓе – две илјади од нив.

„Со сета почит кон островот Норфолк, не сум сигурен дека тој е трговски конкурент на гигантската американска економија, но тоа само покажува и го нагласува фактот дека ниту еден агол на земјата не е изземен од американските царини“, рече австралискиот премиер Ентони Албанес.

Американскиот медиум Политико ја праша Белата куќа зошто ги вклучила овие острови на својата листа – одговориле дека причината е тоа што се австралиски територии.

Списокот ја вклучува и австралиската прекуморска територија на Божиќниот остров, како и британската територија на Индискиот Океан, архипелаг од 58 острови управуван од Лондон кој е ненаселен, освен еден остров наречен Диего Гарсија, дом на американско-британска воена база.

Мали цели на економската политика на Трамп се и Токелау на југот на Тихиот океан, територијата на Нов Зеланд со 1,5 илјади жители, норвешкиот архипелаг Свалбард со 2,5 илјади жители и вулканскиот остров Јан Мајен, каде што никој не живее трајно, туку 18 луѓе од норвешката војска и метеоролошката станица.