Трамп го предупреди Зеленски да не го отфрла договорот за минерални суровини: Ако се повлече, ќе има големи, големи проблеми

30

Американскиот претседател Доналд Трамп го предупреди својот украински колега Володимир Зеленски да не го отфрла договорот за минерални ресурси бидејќи може да биде „во голема неволја“, пренесува Бета.

„Гледам дека тој (Зеленски) се обидува да се повлече од договорот за минерални суровини. И ако го направи тоа, ќе биде во неволја. Ќе има големи, големи проблеми“, рече синоќа Трамп.

Американскиот претседател врши притисок врз Зеленски да потпише договор со кој им се дозволува на американските компании да ископуваат украински минерали додека се преговара за договор за прекин на огнот меѓу Украина и Русија.

„Се договоривме за тоа, а сега тој (Зеленски) вели дека сака повторно да преговара. Тој сака Украина да стане членка на НАТО. Значи, тој никогаш нема да биде членка на Алијансата и тој го разбира тоа. Затоа сега бара повторно преговарање“, рече Трамп.

Претседателот на Украина во петокот вечерта изјави дека од САД добил нова верзија на договорот за стратешка експлоатација на украинските минерални суровини, што, според извештаите на медиумите, е многу неповолно за Украина.

По повеќе од три години војна во Украина, Трамп сака да стави крај на конфликтот. За таа цел, тој стави крај на дипломатската изолација што Западот му ја наметна на рускиот претседател Владимир Путин по почетокот на руската инвазија на Украина.

Неговата администрација се залага за брз прекин на војната и води индиректни разговори со руски и украински претставници. Овие разговори досега не доведоа до никаков конкретен пробив.

ИЗДВОЕНИ