Трамп би можел да ги депортира Европејците во концентрациони логори

Канадскиот пратеник Чарли Ангус предупреди дека според строгата имиграциска политика на администрацијата на актуелниот американски претседател Доналд Трамп, Канаѓаните и Европејците би можеле да завршат депортирани во озлогласениот мега-затвор во Ел Салвадор.

Ангус го објави ова само неколку дена откако администрацијата на Трамп депортираше 238 венецуелски државјани во Центарот за притвор за терористи (Цекот) во Ел Салвадор. Тој затвор е познат по пренатрупаноста и обвинувањата за малтретирање и тортура врз затворениците.

Трамп го искористи Законот за непријателски странци од 1798 година, кој им дозволува на САД да депортираат странски лица без судење. Администрацијата тврди дека депортираните Венецуелци се поврзани со криминалната група Трен де Арагуа, но досега не понудила убедливи докази за тие наводи.

„Знаеме дека ако се извлече од ова, нема причина утре некој Канаѓанец или Германец или некој од Велика Британија да не биде депортиран во некој салвадорски концентрационен логор“, рече Ангус во четвртокот.

„Бидејќи тоа е она што се случува во моментов во Соединетите Држави, со целосно газење на владеењето на правото“, додаде тој. „Канада е земја на владеење на правото, Канада е демократска земја. Канада мора да биде цврста сега. Ги повикувам луѓето да не патуваат во САД, да продолжат да бојкотираат, да останат силни, бидејќи Канада никогаш нема да го бакне прстенот на тој гангстер“, рече Ангус.

„Ние сме вистинските, ние сме северот, ние сме силни, слободни сме, нема да се поклониме и нема да отстапиме ни педа“, рече Ангус. Тој долго време беше гласен критичар на Трамп и неодамна се потсмеваше на, како што рече, „глупоста на Трамп“.

Ангус изјави за левичарската мрежа MeidasTouch дека Канада сака да ги нормализира трговските односи со САД, „но ако одлучиш да не прогласиш за непријател, Доналд, тогаш ќе се бориме до крај, а ти ќе изгубиш“.

Зборувајќи за американската економија, Ангус рече дека „сè почнува да се претвора во циркус“. „Треба да разбереш, Доналд, дека економијата е поголема, попаметна и посериозна од твојата глупост“, рече тој.

Тој ја критикуваше и одлуката на Трамп да ги нормализира односите со Русија додека трае војната во Украина. „Ги лижевте чевлите на Путин, му се поклонивте како послушен извидник“, рече Ангус. „Тој човек е воен злосторник, срамота е, ја излижавте и Северна Кореја, а сега вашиот најголем непријател во светот е Канада затоа што мислевте дека ќе бидеме лесна мета“, заклучил тој.