„Трамп беше сериозен“: Волстрит бележи пад втора недела по ред

Цените на акциите на Волстрит паднаа минатата недела, втора недела по ред, бидејќи инвеститорите се загрижени за тарифните закани, додека европските берзански индекси пораснаа благодарение на намалувањето на каматните стапки во Европа.

На Волстрит, Dow Jones падна за 0,55 отсто на 44.303 поени, додека S&P 500 се лизна за 0,25 отсто на 6.025 поени, а индексот Nasdaq падна за 0,5 отсто на 19.523 поени.

На самиот почеток на неделата овие индекси значително паднаа бидејќи одлуката на американскиот претседател Доналд Трамп да воведе царини за Канада, Мексико и Кина предизвика страв од трговска војна.

Сепак, ситуацијата набрзо се смири бидејќи Трамп го одложи спроведувањето на царините за Мексико и Канада за еден месец, откако двете земји ветија дека ќе вложат повеќе напори на границите за да се запре илегалната миграција и шверцот на дрога.

„Трамп го мислеше тоа кога рече дека царините ќе бидат главната алатка за постигнување различни цели. Ризикот од царините ќе предизвика нестабилност на пазарите на краток рок“, вели Керол Шлајф, директорка во семејната канцеларија на БМО.

Додека Вашингтон ја одложи примената на царифите за увоз од Канада и Мексико, царините од 10 отсто за увозот од Кина стапија на сила во средината на минатата недела.

Пекинг брзо возврати и најави воведување дополнителни царини од 10 до 15 отсто за увоз на одредени производи од САД, почнувајќи од 10 февруари.

Инвеститорите се надеваат дека сепак ќе се избегне трговска војна, бидејќи Белата куќа објави дека Трамп наскоро ќе разговара со кинескиот претседател Кси Џинпинг.

И покрај тоа што несигурноста околу тарифите го оптоварува пазарот, таа е поддржана од солидни квартални деловни резултати од американските компании.

Досега повеќе од половина од компаниите во индексот S&P 500 објавија финансиски извештаи, при што приближно 77 отсто од нив пријавија заработка поголема од очекуваната.

Европските берзи растат втора недела по ред.