Технолошкиот цар го напушта тронот во Вашингтон: Што ќе се случи со DOGE без Илон Маск?

Најбогатиот човек на светот, Илон Маск, изјави дека неговата „работа во Вашингтон главно е завршена“, што би можело да ги смири акционерите на Tesla – но неговото повлекување може да му ја одземе енергијата на DOGE (Одделот за владина ефикасност) што предизвикува големи намалувања во федералната администрација.

За да ги смири вознемирените акционери на Tesla по разочарувачкиот извештај за заработката во првиот квартал, Маск им рече на инвеститорите оваа недела дека наскоро ќе го намали своето тековно учество во DOGE на само еден или два дена неделно.

Пораката до пазарите беше јасна: Маск повторно се фокусира на своите компании.

Но, неговото јавно повлекување од Вашингтон го остава DOGE без јасен лидер, потенцијално ослабувајќи ја групата која агресивно ги потресе агенциите во првите 100 дена од вториот мандат на Трамп и доведе до бројни отпуштања и распуштања на УСАИД и други агенции вклучени во финансирањето и помагањето на другите земји. Без постојаното присуство на Маск заедно со претседателот Доналд Трамп, DOGE можеби нема повеќе да го има истото влијание, а лидерите на агенциите сега може да имаат поголема слобода да ги спроведат мерките за штедење со сопствено темпо.

Внатрешни извори велат дека повлекувањето на Маск нема драстично да го промени оперативното функционирање на DOGE „на хартија“.

„Ова не е голема промена“, рече висок претставник на администрацијата на Трамп.

Операцијата што ја изгради Маск сега е вкоренета во речиси секој дел од извршната власт. Повеќето вработени во DOGE се политички назначени лица без ограничување на мандатот. Другите се со седиште во Администрацијата за општи услуги (GSA), која сега е команден центар за DOGE под водство на софтверскиот претприемач и сојузник на Маск, Стивен Ехикијан. Оттаму, малите, независни агенции – како корпорацијата Милениумски предизвик со 300 вработени – тивко се затвораат.

Соработниците на Маск, Антонио Грасијас и Стив Дејвис остануваат вклучени во водење на иницијативата, обезбедувајќи насоки за персоналот на DOGE низ агенциите, истовремено помагајќи да се спроведе долгиот процес на намалување на работната сила.

Маск, иако ветува дека ќе се повлече, нема намера тоа да го направи целосно.  Претставници на Белата куќа велат дека поради неговото лично пријателство со Трамп, тој ќе продолжи да се појавува во Вашингтон најмалку еднаш неделно.

Во неговите компании, тој имаше навика да присуствува на неделни состаноци и да дава директни коментари – како со роботот на Тесла Оптимус или со кампањата за Америка PAC.

„Мислам дека ќе продолжам да трошам ден или два неделно на владини прашања, се додека тоа го сака претседателот и се додека има смисла“, рече Маск за време на разговорот со инвеститорите.