Во КСП Центар Јадро денеска беше отворена архитектонска изложба на студентски проекти за идејно решение за нови спортски структури.
Годинешнава тема е создавање спортски комплекси со повеќенаменска улога, каде ќе бидат вклучени и комерцијални, културни и социјални содржини што ќе се надополнуваат.
Овој концепт наречен „јавен кондензатор“ претставува поврзување на сите овие елементи во една функционална целина, која ќе биде динамична, флексибилна и корисна за граѓаните во секое време.
Во своето излагање градоначалникот на Општина Центар, Горан Герасимовски истакна дека ова е седма година по ред како имаат успешна соработка со Архитектонскиот факултет, истакнувајќи дека е горд на сите пристигнати трудови и вредната работа на студентите да одговорат на предизвиците за проектирање општествени згради во оваа урбана општина.
-Темата беше предизвикувачка, со оглед на тоа дека спортот станува се’ поважен дел на современиот животен стил, а со тоа и потребата од нови спортски структури, односно спортски и рекреативни објекти во една урбана средина на живеење. Одличната соработка со Архитектонскиот факултет продолжува и понатаму, а Општина Центар останува да биде дел од менторскиот процес со студентите и нивното усовршување како идни архитекти на нашиот град – изјави Герасимовски.
Во рамки на традиционалната архитектонска студентска изложба, со свои презентации се претставија и студентите од трета и четврта студиска година, со проекти за општествени згради на теми: „Училиште во парк“ и „Паркинг куќа“ во Дебар Маало.
Изложбата ќе биде отворена до 27 февруари.
