Поради бранот студен воздух на северот од Европа, дождот почна да преминува во снег во Словенија и планинските делови, а повеќе снег се очекува во остатокот од денот. Кон Балканот се движи силен циклон од Џеновскиот залив кој во следните два дена ќе се премести преку Јадранот понатаму на исток, а дел од него ќе се претвори во студен фронт.
Овој циклон транспортира многу топла воздушна маса од северот на Африка во нејзиниот преден дел кон југоисточна Европа, а во исто време, во задниот дел повлекува многу студена воздушна маса низ централна Европа сè до Алпите и Панонската низина.
Силното заладување веќе го зафати поширокото подрачје на Алпите, па така на повисоките делови веќе провејува снег, од француските Алпи на запад до словенечките Алпи на исток. Снежната граница се спушта сè пониско, пренесува Телеграф.
Снег ќе врне во овие предели и во наредните два дена, особено денеска. Се очекува да наврне нов снег од 10 до 30 сантиметри локално и повеќе.
Најобилен снег се очекува на Алпите на југоистокот од Франција, во Швајцарија, на југот од Германија, на северот на Италија, на западот и југот на Австрија и во Словенија.
Во Словенија вчера веќе провејуваше снег во највисоките делови. Големи количества снег се очекува да наврнат во пограничниот појас на Италија, Словенија и Австрија над 1500 – 2000 метри надморска височина, каде би паднал и до половина метар нов снег.
Температурите веќе паднаа многу под 0 степени во овие области, при што бурните северни ветрови создадоа наноси.
Со натамошно заладување се очекува снежната линија да се спушти до 1000 метри надморска височина, локално и пониско.
