Странските инвеститори под најголем притисок од царините на Трамп

Директните ефекти од воведените царини од САД кон Северна Македонија ќе бидат многу мали. Ефектите ќе бидат индиректни и негативни, но нема да се почувствуваат веднаш, покажува анализата на „Finance Think“.

– Нашата трговија со САД е ограничена, главно поради географската оддалеченост. Во 2024, извозот во САД како удел во вкупниот извоз изнесуваше 1,4%, што е многу мал удел. Од таа гледна точка, директните ефекти од зголемените царини ќе бидат многу мали, оценува „Finance Think“.

Оттаму сметаат дека најголем притисок од американските царини ќе почувствуваат, пред сè, странските компании кои работат во земјава затоа што речиси 90 проценти од извозот кон САД во 2024 година бил концентриран во 20-ина производи, при што освен автобусите кои имаат доминантно учество, уште неколку производи се врзуваат со работата на странските фабрики во ТИРЗ-технолошко-индустриските зони.

– Сепак, странските фабрики во ТИРЗ-технолошко-индустриските зони се изложени на позначаен индиректен ефект. Тие се дел од глобалните синџири на снабдување, што подразбира дека иако тие извезуваат кон својата фирма-мајка која не е во САД, понатаму фирмата-мајка може да е и изложена кон американскиот пазар. Царините ќе влијаат врз вкупните трошоци на фирмата-мајка, што ќе се одрази и кај нас, во негативни сценарија преку т.н. каскадни ефекти на намалено производство и работни места, се вели во анализата.

Се проценува дека падот на германската економија ќе биде посилен од просечниот пад на ниво на Европската Унија, што секако ќе се одрази и врз македонската економија која е високо зависна од трговијата со Германија.

Најзначајните последици, ќе се почувствуваат во автомобилската индустрија, особено за електричните возила (EVs), што е исто така значајно за земји како нашата кои се вклучени во автомобилските синџири на снабдување.