Собрани рекордни 247 милиони денари од надоместоците за минерални суровини

Наплатата на надоместоците за експлоатација на минерални суровини во првиот квартал од 2025 година достигна 247.491.155 денари. Ова претставува повеќе од двојно зголемување во однос на истиот период во 2024 година, кога беа наплатени 110.576.324 денари.

– Министерството спроведе сериозни активности за зајакнување на наплатата на надоместоците, вклучувајќи испраќање писмени опомени до концесионерите со предупредување за можен раскин на концесијата доколку не ги подмират навреме обврските, засилување на редовните и вонредните инспекциски контроли на терен, едностран раскин на десетина договори со концесионери кои не ги почитувале законските обврски, со уште десетина постапки во тек. Овој значаен раст е резултат на посветените и засилени активности на Министерството за подобрување на наплатата и зајакнување на контролата врз обврските на концесионерите – велат од Министерството за енергетика, рударство и минерални суровини (МЕРМС).

Од 1 јануари 2025 година на сила е новиот Тарифник кој овозможува фер наплата за користење на националните богатства

– Со новиот Тарифник, висината на надоместоците за издавање дозволи и концесии за експлоатација на минерални суровини е зголемена до 100%, со цел да се обезбеди правична вредност за користење на природните ресурси. Клучните измени вклучуваат зголемување на надоместокот за користење простор за експлоатација за околу 30%, надоместок за експлоатација на мермер: 5% од приходот од продадената суровина, наместо од претходна фиктивна цена, зголемување на надоместокот за металични минерални суровини од 2% на 4% и просечно зголемување над 100% за неметалични минерални суровини – потенцираат од МЕРМС.

Овие измени не се однесуваат на енергетските минерали, како јагленот, со цел да се избегне дополнителен притисок врз цените на електричната енергија.

– Порастот на наплатата директно влијае врз зголемувањето на буџетите на општините каде што работат концесионерите, како и на буџетот на Република Македонија. Овие средствата се користат  за изградба и одржување на комунална инфраструктура на подрачјето на единиците на локалната самоуправа, проекти за одржлив развој и  енергетска транзиција и за спроведување на проекти за заштита на животната средина – нагласуваат од МЕРМС.