Со подароци и македонски ајвар пречекани првите 58 патници на „Изиџет“ од Париз

Линијата ќе се реализира два пати неделно и се до 31 декември 2027 година и истата е воведена како резултат на финансиската подршка што ја овозможи Владата преку Министерството за транспорт преку Програмата за воведување на нови дестинации. За вицепремиерот и министер за транспорт, Александар Николоски, ова е уште една можност за подобра комуникација и поврзување на Македонија со европските земји и европските метрополи. Од Скопје, освен Париз, се воведуваат и линиите кон Дубаи, Штутгарт, Лион, Барселона, Женева и Амстердам, а од Охрид кон Истанбул и Басел

Скопје и Париз директно се поврзаа со новата авиолинија Скопје – Париз што од главниот париски аеродром „Орли“ го реализираше авиокомпанијата „Изиџет“.  Со симболични подароци и македонски традиционален ајвар, и уникатни разгледници со знаменитостите на Скопје, беа пречекани првите 58 патници кои пристигнаа од Париз. Линијата ќе се реализира два пати неделно и се до 31 декември 2027 година и истата е воведена како резултат на финансиската подршка што ја овозможи Владата преку Министерството за транспорт преку Програмата за воведување на нови дестинации.

За вицепремиерот и министер за транспорт, Александар Николоски, ова е уште една можност за подобра комуникација и поврзување на Македонија со европските земји и европските метрополи.

– Париз е атрактивна дестинација за патување, но уште поважно е дека туристи ќе носиме во Македонија. Како Влада создаваме услови со кои привлековме нови авиокомпании во Македонија и резултатите веќе се видливи. Осум нови дестинации од аеродромот во Скопје и две од аеродромот во Охрид се воведени за многу краток период. Го променивме целосно моделот на субвенционирање и наместо за заминување, даваме финансиска подршка за патници во доаѓање затоа што целта е што повеќе луѓе да доаѓаат во Македонија, а тоа значи дека ќе користат и други услуги во земјава. Ова е стартегија што ја применуваме од самиот почеток и која ни дава конкретни резултати. Веќе преговараме со други авиокомпании и мислам дека сме на добар пат да постигнеме договор за нови дестинации – истакна вицепремиерот Николоски.

Капетанот на првиот лет на „Изиџет“ и заменик-генералниот директор на ТАВ Македонија, Перо Лупевски, ја пресекоа тортатa со која го означија отворањето на оваа редовна авиолинија.

– „Изиџет“ од Париз – Орли до Скопје и назад ќе лета два пати неделно, односно секоја среда и секоја сабота, нудејќи им уште една опција на нашите патници кои сакаат да патуваат до Париз, а секако и од Париз понатаму во Европа, имајќи предвид авиокомпанијата лета до 160 аеродроми во 35 земји. Не само што оваа нова рута е значаен чекор напред во проширување и подобрување на мрежата на авиолинии од Меѓународниот Аеродром Скопје, туку и нуди погодни и различни можности за нашите патници, поттикнува поголема туристичка и економска поврзаност – изјави Лупевски.

Реџиналд Отен, заменик директор на „Изиџет“ за Франција исткана дека во 2024 година 3,4 милиони патници одбраа да патуваат со оваа авиоком панија преку Орли.

– Со оваа нова дестинација се надеваме дека ќе им овозможиме на илјадници парижани да ги откријат убавините и уникатноста на Балканот, секогаш со одлична вредност за парите – изјави Отен.

Во среда, времето на пристигнување на скопскиот аеродром е 8:45 часот, а времето на полетување од скопскиот аеродром до аеродромот Орли во Париз е 9:25 часот, а во сабота летот од аеродромот Орли до скопскиот аеродром пристигнува во 8:55 часот и полетува до аеродромот Орли во 9:35 часот.

Линијата Скопје-Париз е дел од договорот за финансиска подршка за воведување на нови авиолинии што го реализира Министерството за транспорт преку јавен повик за субвенционирање. Од Скопје, освен Париз, се воведуваат и линиите кон Дубаи, Штутгарт, Лион, Барселона, Женева и Амстердам, а од Охрид кон Истанбул и Басел.

Согласно Програма за финансиска подршка 2025-2027 година донесена од страна на Владата, предвидени се 360 милиони денари за субвенции за воведување на нови авиолинии. Оваа Програма има за цел да да го унапреди авиосообраќајот, да се обезбедат нови дестинации преку поволни услови за патување за граѓаните како и развој на цивилното воздухопловство.

ТАВ Македонија, како дел од ТАВ Аеродроми, членка на Групацијата АДП, од своја страна продолжува да се фокусира на проширување на својата меѓународна мрежа на летови, со цел да обезбеди поголема удобност и повеќе опции за патување за патниците од Меѓународниот Аеродром Скопје и Аеродромот Свети Апостол Павле Охрид, истовремено поттикнувајќи ги туристичките и економските можности во земјата и регионот.

(С.Бл.)