Со „паметни часовници“ до автоматски повик на 112

Со напредокот на технологијата продолжува надоградувањето на системот на Центарот за управување со кризи, поточно со „паметни часовници“ ќе може да се оствари автоматски повик на единствениот број 112.

-Системот постојано се надоградува и е отворен за надоградување, согласно искуствата на европските држави, а и напредокот на технологијата. На пример, последно такво надоградување е остварување, односно примање повик од „паметен часовник“, кога има детекција на губење на пулс и алармирање – конкретно автоматско јавување на 112 – појаснуваат од ЦУК.

Воедно, информираат дека системот прима повици од „паметен часовник“ (Google pixel watch 3) преку „андроид“ телефон, со што е поврзан и има напредни сензори за следење на здравјето на корисникот меѓу кои и детекција на губење на пулсот („loss of pulse detection“).

– Кога истиот ќе регистрира продолжен период без пулс на корисникот, часовникот автоматски иницира повик до 112 со снимена порака со информации за итноста и точната локација (GPS координати) на корисникот. Системот за итни повици 112 во ЦУК овозможува и е отворен за интегрирање на други напредни технологии преку што граѓаните ќе можат да добијат итни услуги ако за тоа имаат потреба, потенцираат од Центарот.

Исто така, системот при директни телефонски говорни повици веднаш снима или го обработува повикот со координати (GPS) за локацијата на повикувачот,  овозможувајќи брза комуникација со повикувачите и ефикасно споделување информации со службите за брз одговор.

Воедно, системот поддржува примање и праќање на текстуални пораки со координати (GPS) за локација и е канал за комуникација со граѓаните „кои од какви било причини не можат да зборуваат и граѓани со потребни потреби – на пример, глувонеми лица“.

– Системот прима повици преку  „и – кол“ директна врска со возила опремени со „и – кол“ модул. Тоа овозможува автоматско примање на гласовни повици на 112 во ЦУК со координати (GPS) за локацијата на повикувачот, во случајот возилото, кога модулот ќе детектира сериозен судир. Системот автоматски обработува текстуални пораки што содржат координати (GPS) за локација од „андроид“ апарати што имаат инсталирано СОС апликации што испраќаат порака до 112 во ЦУК, во случај на детектиран сериозен судир или пад. При сериозен потрес или судир, „ајфон“ уредите автоматски испраќаат снимена порака со координати (GPS) за локација, овозможувајќи итна реакција дури и ако корисникот не е во состојба самиот да се јави на 112 и да побара помош – потенцираат од ЦУК.

Нагласуваат дека воведувањето единствен повикувачки број за итни случаи – 112 донело повеќе предности за граѓаните на кои им е потребна помош, а и на службите и институциите од системот за управување со кризи.

– Имаме единствен, универзален број за сите итни случаи, бесплатен е, интегрира различни служби за итни случаи, како што се полиција, противпожарна заштита и итната медицинска помош во еден обединет систем, лесен е за паметење и бирање, што го прави лесно достапен за населението, може да се бира од телефони без „сим“ (SIM) картичка или со заклучена тастатура, барањето на 112 од мобилен телефон, автоматски обезбедува точни информации за локацијата („ГПС“ – GPS координати) на јавувачот, овозможувајќи побрзо време за одговор, реагирање на терен, интеграцијата на службите за итни случаи – полиција, Итна медицинска помош и противпожарна заштита, овозможува поефикасно користење на ресурсите, затоа што повеќе институции, односно служби се координирани за и во согласност нивните активности од еден центар – велат од ЦУК.

Покрај овие три институции, служби, кога е потребно за помош да се ангажираат и дополнителни други институции и служби од системот за управување со кризи, тоа се остварува повторно од истиот центар –  истакнуваат од ЦУК потенцирајќи ги можностите на системот.

Од ЦУК потсетуваат дека единствениот повикувачки број за итни случаи е достапен на целата територија на државава. Пуштен е во употреба на 11 февруари 2022 година.