Со европска и домашна експертиза до побезбедна храна

Агенцијата за храна и ветеринарство (АХВ) повторно е дел од кампања Safe2Eat 2025 на Европската агенција за безбедност на храната (EFSA). Оваа година кампањата ќе се реализира по петти пат и АХВ акцент ќе стави на темите поврзани со додатоците во исхраната, безбедното ракување со храна, здравствените тврдења и влијанието на храната врз здравјето на граѓаните.

– EFSA настојува на потрошувачите да им обезбеди јасни, научно поддржани факти за безбедноста на храната и совети, со цел да им помогне да прават избор на храна како информирани потрошувачи. Годинава означувајќи значајна пресвртница во нејзината мисија да им помогне на повеќе Европејци да ги прават своите избори на храна со доверба, во кампањата Safe2Eat 2025, учество земаат 23 земји: Албанија, Австрија, Белгија, Босна и Херцеговина, Хрватска, Кипар, Чешка, Естонија, Финска, Грција, Унгарија, Ирска, Италија, Латвија, Луксембург, Црна Гора, Македонија, Норвешка, Полска, Романија, Словачка, Шпанија и Турција – информираат од АХВ.

Активностите поврзани со темите што ги одбра АХВ во рамки на оваа кампања на EFSA, ќе се реализираат во соработка со операторите, науката, стопанските и независната Лекарска комора и со претставници од невладиниот сектор.

– Во соработка со граѓаните како потрошувачи, согласно Акцискиот план на кампањата, ќе бидат направени неколку јавни анкети поврзани со прашањата кои се однесуваат на додатоците во исхраната, здравствените тврдења, безбедното и правилно ракување со храната и за влијанието на храната врз здравјето на потрошувачите. Резултатите од анкетите АХВ ќе ги сподели со македонските граѓани и со EFSA за понатамошна евалуација – велат од АХВ.

Европскиот, како еден од најригорозните системи за безбедност на храна на глобално ниво е поддржан од најсовремената наука и вклучува тесна соработка меѓу EFSA и националните власти за безбедност на храната низ Европа, вклучително и со Македонија, при што, сите имаат клучна улога.

– Врвни научници од Европа прават проценка на безбедноста и хранливата вредност на храната и даваат совети, тесно соработувајќи со национални и меѓународни партнери, производители, организации на потрошувачи и групи од граѓанското општество. Заедно, тие ја комбинираат експертизата на ЕУ и националната, обезбедувајќи примена на најновите докази и пристапи со цел обезбедување на безбедност на храната за европските и за македонските граѓани.

Според оценките на EFSA, ланската кампања Safe2Eat 2024 достигнала рекордни нивоа на влијание допирајќи до 45 проценти од целната публика низ Европа, односно до повеќе од 50 милиони Европејци. Оние граѓани кои ја прифатиле кампањата, биле повнимателни при изборот на храна, водејќи сметка за нејзината безбедност.

– Годинашнава кампања има за цел да ги реши клучните грижи на потрошувачите за безбедноста на храната, како што се: улогата на науката за обезбедување безбедна храна, ставајќи акцент и на важноста на јасното означување на храната и придобивките од намалувањето на отпадот од храна. Зголемена ќе биде и достапноста на информациите за безбедноста на храна со нови, лесно разбирливи содржини, прилагодени на различни демографски и културни контексти – велат од АХВ.