Во Србија започна владината промотивна акција „Најдобра цена“, со намалени цени на околу 700 производи се до крајот на октомври. Премиерот Милош Вучевиќ на презентацијата на акцијата рече дека вклучува 81 производ, а попустот во просек ќе биде 26,82 отсто и тој очекува домаќинствата да заштедат од 8.000 до 22.000 динари месечно со купување на производи кои ќе бидат вклучени во акцијата.
– Станува збор за важни производи кои ја сочинуваат потрошувачката кошничка, а овде зборуваме за производи како што се средства за лична хигиена, прашок за перење, пелени за бебиња, храна за бебиња, сокови, хемикалии за домаќинство, секакви видови храна, јајца, сладолед, овошје, зеленчук, месо и млечни производи, јогурт и млеко. Намалувањето на овие намирници во просек ќе изнесува близу 27 отсто, преточено во обичен речник – граѓаните во домашниот буџет ќе имаат една третина повеќе пари во споредба со претходното купување на овие производи – изјави Томислав Момировиќ, министер за внатрешна и надворешна трговија за српски Курир.
Поевтинувањата ќе се движат од седум отсто, колку ќе се намали цената на киселото млеко, до 58 отсто, колку што ќе поевтини прашокот за перење. На пример, цената на стиснатата шунка ќе се намали од 1.199,99 динари на 799,99 динари, шунка во црево од 829,99 на 599,99 динари, компири од 84,99 на 59,99 динари, сирење од 899,99 на 689 динари. Цената на килограм пилешко ќе се намали за 15,22 отсто, свинско за 11,57 отсто, јајцата за 13,41 отсто, компирите за 27,65 отсто.
Кога станува збор за средствата за хигиена, детскиот шампон ќе поевтини за 34,87 отсто, пелените за бебиња за 28,64 отсто, а пакувањето од две четкички за заби за 33,17 отсто. Со акцијата вклучена е и сувата храна за домашни миленици, која ќе поевтини за 30 отсто, па седум килограми храна за кучиња наместо 999,99 динари ќе чинат 699,99 динари.
