Сметководството влегува во нова ера – стандардите како предизвик, технологијата како сојузник

Претседателката на Институтот на сметководители и овластени сметководители (ИСОС), Весна Прентоска, истакна дека сметководствената професија се наоѓа на прагот на суштински промени. – Нашата улога денес оди подалеку од традиционалните функции на пресметка и евидентирање – ние сме советници и партнери во управувањето со финансиите, во донесувањето стратешки одлуки, во управувањето со ризици и во обезбедувањето транспарентност и доверба во бизнисите, институциите и организациите, рече Прентоска

Сметководствената професија е потребно да го следи чекорот со глобалните трендови и да ја прифати дигиталната трансформација како сојузник, а меѓународните стандарди како темел за доверба и одржлив развој. Истовремено, вложувањето во новата генерација професионалци и поддршката за нивниот професионален развој претставуваат клучна инвестиција во иднината на професијата.

Ова се дел од главните пораки упатени на втората регионална конференција на сметководители и овластени сметководители што денеска се одржа во Скопје, во организација на Институтот на сметководители и овластени сметководители (ИСОС).

– Оваа конференција е многу повеќе од само уште еден професионален собир. Таа е заедничка платформа преку која се гради иднината на сметководството во нашата земја – заснована на интегритет, квалитет, дигитализација и регионална и меѓународна соработка – рече претседателката на ИСОС, Весна Прентоска.

Според неа, сметководствената професија се наоѓа на прагот на суштински промени.

– Нашата улога денес оди подалеку од традиционалните функции на пресметка и евидентирање – ние сме советници и партнери во управувањето со финансиите, во донесувањето стратешки одлуки, во управувањето со ризици и во обезбедувањето транспарентност и доверба во бизнисите, институциите и организациите – истакна Прентоска.

Панел-дискусиите во рамки на конференцијата беа посветени на имплементацијата на Меѓународните сметководствени стандарди и ЕSG  принципите во финансиско известување, како и улогата на младите професионалци во новата ера на сметководството.

Еминентни практичари од земјата и регионот ги презентираа најдобрите практики и модели за примена на вештачката интелигенција и алатките за анализа на податоци од голем обем (Big Data), кои можат да придонесат за поголема ефикасност, прецизност и стратешко одлучување во сметководството, адаптирано на потребите на современото деловно опкружување.

Во фокусот на дискусиите на конференцијата беа и прашањата околу тоа како да се одржи суштината на сметководствената професијата, што ја сочинуваат етиката, точноста и независноста, во услови на брзи технолошки промени.

– Присуството на младите на оваа конференција е силна порака дека иднината на професијата е во сигурни раце. ИСОС ќе креира простор за активно учество на студентите и младите професионалци во новата ера на сметководството во нашата земја – преку модели за собирање на нивните предлози и размислувања, но и преку можности за учење и развој на практични вештини кои ќе им помогнат на патот нивниот професионален развој – порача претседателката на ИСОС.

На конференцијата учествуваа околу 500 сметководители и овластени сметководители од земјава и регионот, како и претставници од релевантни домашни и меѓународни институции, организации, од академската заедница и деловниот сектор. Конференцијата е дел од пошироките напори на ИСОС за континуирана едукација, регионална и меѓународна соработка и зајакнување на професионалните капацитети и угледот на сметководствената професија во нашата земја.