Претседателката на Европската комисија, Урсула фон дер Лајен неделава треба да ги соопшти имињата на 26-те комесари кои ќе го сочинуваат нејзиниот тим во новиот мандат, а во прераспределбата на позициите се издвојуваат неколку сектори.
Изборот на 26 комесари за Урсула фон дер Лајен нема да биде нималку лесна работа, имајќи предвид дека на оваа работа претседателот на Европската комисија треба да балансира меѓу полот, припадноста на политичка опција и земјата од која доаѓа.
Покрај сето тоа, неминовно има и лобирање што се одвива зад затворени врати, но и во директни разговори меѓу Фон дер Лајен и лидерите на земјите.
Иако најголемите копја дефинитивно ќе се скршат околу прашањето за еврокомесар за економија, одбрана и енергетика, за Македонија и другите земји кои се стремат кон Европската унија, најважниот избор секако ќе биде оној поврзан со функцијата комесар за проширување.
Досега оваа работа ја извршуваше унгарскиот претставник Оливер Вархеји, а претседателот на Европската комисија истакна дека оваа функција ќе биде уште поважна во новиот мандат и дека ќе има специјален комесар за проширување на Европската унија.
По изборот и распределбата на позициите, Будимпешта објави дека сака Унгарија да ја задржи оваа позиција. Сепак, земајќи ги предвид односите меѓу Брисел и владата на Орбан и критиките со кои се соочува Вархеји во Европскиот парламент, многу е тешко да се очекува Урсула фон дер Лајен засега да го прифати неговиот нов мандат.
Едно од имињата што се споменуваат покрај Вархеји е името на Валдис Домбровскис, летонски политичар кој во претходниот мандат беше и потпретседател на Европската комисија.
„Балтичките земји силно се за пристапување на Украина во Европската унија. Кандидат од централна или источноевропска земја може да донесе клучни знаења во овој поглед. Исто така, тој може да се смета за неутрален за проширувањето“, наведува Политико.
Прашањето за изборот на еврокомесарот за проширување секако е важно за Македонија, имајќи предвид дека токму овој комесар ќе биде во најинтензивни контакти со домашните политички претставници.
Она што евентуално му оди во прилог на Домбровскис за изборот на оваа функција е што во тој поглед би соработувал и со естонската функционерка Каја Калас, која во новото свикување треба да ја заземе функцијата висок претставник на Европската унија за надворешна политика, што до сега го држеше Жосеп Борел.
Имајќи го предвид сличното размислување на балтичките земји во однос на проширувањето на Европската унија, извесно е дека односот Домбровскис-Калас е многу постабилен на овој план, отколку што би било случај со некои други политички опции.
Според Политико во новиот состав на Комисијата би биле Тери Бретон, Рафаело Фито, Валдис Домбровскис, Марош Шефчовиќ, Тереза Рибеира, Каја Калас, Магнус Брунер, Хаџа Лабиб, Екатарина Захаријева, Дубравка Шуица, Костас Кадис, Јозеф Сикела, Јоргенсен, Хена Виркунен, Апостолос Цикикостас, Оливер Вархељи, Мајкл Мекграт, Андријус Кубилијус, Кристоф Хансен, Глен Микалеф, Вопе Хоекстра, Пјотр Серафин, Марија Луис Албукерки, Роксана Минзату, Џесика Розвал. Сер чека и на предлогот на кандидатот на Словенија, откако Томаж Весел се повлече од кандидатурата. Фон дер Лајен побара Словенија да предложи жена кандидат, што се уште не се случило.
