Скопје се удави во ѓубре

Скопје сè уште е полно со ѓубре. Наместо да биде собрано, тоа уште повеќе се таложи. Контејнерите се прелеваат, а уличните кучиња и мачки уште повеќе го разнесуваат, ширејќи ја и непријатната миризба. За ваквата состојба, скопските градоначалници обвинуваат дека ЈП „Комунална хигиена“, по кој знае кој пат, потфрлило со одржувањето на хигиената. Оттаму се правдаат дека  празнењето на комуналниот отпад од контејнерите и од кантите во индивидуалните домаќинства се одвива редовно, според Оперативниот план за собирање комунален отпад на територијата на Градот Скопје, а вината ја префрлија на општинските комунални служби, за кои велат дека на диво го исфрлаат собраниот отпад во садовите поставени од ЈП „Комунална хигиена“, но и на зелените површини во Општината

Скопје сè уште е полно со ѓубре. Наместо да биде собрано, тоа уште повеќе се таложи. Контејнерите се прелеваат, а уличните кучиња и мачки уште повеќе го разнесуваат, ширејќи ја и непријатната миризба. Недозволиво е да се случува тоа токму во центарот на градот, па и во другите населби. Еден од таквите примери се подземните контејнери зад кинеската Амбасада, во кои повеќе нема место за отпад, па црните вреќи во кои е спакувано ѓубрето наместо во нив, се оставени околу нив. Очигледно е дека службите на ЈП „Комунална хигиена“ не поминале со своите возила подолго време за да ги испразнат контејнерите, иако оттаму постојано се јавуваат со соопштенија дека нивните екипи се ажурни, дека го собираат ѓубрето и дека ги расчистуваат дивите депонии во повеќе скопски општини.

Граѓаните и од другите делови на градот јавно реагираат дека иако треба да се собира сметот во одредените денови, два пати во неделата, не се прави тоа. Велат дека се случува не само да се прескокнува еден од тие два дена во неделата туку и да не доаѓаат камионите ниту еднаш во неделата, а  ѓубрето се таложи. Но, изгледа дека нема кој да ги слушне.

– Дали има некој информација кога ќе почне да работи „Комунална хигиена“? Веќе четврта недела не го собираат ѓубрето на улицата „Благоја Стефковски“ – вели жителка од населбата Маџари.

Граѓаните се револтирани, и тоа со право, бидејќи велат дека редовно ги плаќаат сметките.

И општините повторно се жалат дека Град Скопје и ЈП „Комунална хигиена“, по кој знае кој пат, потфрлиле во одржувањето на хигиената. Од Општина Центар нагласија дека дебармаалци се соочиле со идентична глетка како пред два месеци: преполни контејнери со смет и лоша миризба, кои, како што велат, не само што се закана за здравјето на центарци туку и го нагрдуваат изгледот на централното градско подрачје, каде што циркулираат голем број граѓани.

– Нашите општински служби го подигнаа сметот од подземните контејнери во Дебар Маало, каде што надлежност имаат „Комунална хигиена“ и Град Скопје. Одржувањето на хигиената во Центар мора да биде приоритет, затоа што таму секојдневно се движат голем број граѓани. Како локална самоуправа, неколку пати имаме испратено допис до надлежните институции, со барање за поажурно и поефикасно извршување на нивните обврски. Граѓаните заслужуваат чиста средина, и ние ќе продолжиме да инсистираме на решавање на овој проблем – изјави градоначалникот на Општина Центар, Горан Герасимовски, повикувајќи ги граѓаните да пријавуваат смет и диви депонии на телефонските броеви 076/350-767 и 02/3203-693 за брзо да интервенираат службите.

И градоначалникот на Општина Карпош, Стевчо Јакимовски, е лут поради ужасната состојба со хигиената во неговата општина и воопшто во Скопје. Тој обвини дека цело Скопје е заробеник на неспособноста на ЈП „Комунална хигиена“ да ја одржува хигиената во градот и побара со новиот закон за локална самоуправа, ова јавно претпријатие да се подели меѓу општините во градот, заедно со парите што ги плаќаат граѓаните за одржувањето на чистотата.

– Седумстотини илјади жители на Скопје се заробеници на ЈП „Комунална хигиена“. Имаше изговори дека во текот на рамазанските празници помалку работат, дека треба да се стрпиме. По населбите каде што требаше да ги подигнат кантите, дури и со недели не доаѓаа да ги земат. Ајде и тоа да го разбереме. Изгледа сега имаат добиено шеќерен шок од рамазанските пости и гледајте на што личи ова. Вака беше изминативе 30-40 години, очигледно вака ќе биде и во наредните 40 години, благодарение на ЈП „Комунална хигиена“ и на неодговорниот однос на Владата, која, очигледно, прави измени на Законот за локална самоуправа, во кој најбитно било да се смени градоначалникот, ама не е најбитно да се решат проблемите. Ова е еден од најгорливите проблеми на Карпош и на Градот Скопје – истакна Јакимовски.

Тој, исто така, бара и законски измени со кои ќе се казнуваат сите оние што не го фрлаат ѓубрето во канти, затоа што владее целосна општествена неодговорност. Градоначалникот апелираше и до министерот за транспорт да не ги чува измените на Законот за домување и да се донесе нов закон за комунална инспекција за, конечно, да се решат овие проблеми и Скопје да заличи на метропола.

Од ЈП „Комунална хигиена“ одговорија на реакцијата на Јакимовски дека празнењето на комуналниот отпад од контејнерите и од кантите во индивидуалните домаќинства во Општина Карпош се одвива согласно со редовната динамика предвидена со Оперативниот план за собирање комунален отпад на територијата на Градот Скопје.

Оттаму ја префрлаат вината на општинските комунални служби, за кои велат дека на диво го исфрлаат собраниот отпад во садовите поставени од ЈП „Комунална хигиена“, но и на зелените површини во Општината.

– Веројатно, тоа е причината за неговата неконтролирана реакција во јавноста, на сметка на „Комунална хигиена“ – возвратија од претпријатието.

Притоа, апелираа до Јакимовски да го прочита Законот за управување со отпад и веднаш, како што нагласија, да престане со подметнувањата и со неоснованите напади, заканувајќи се дека ќе биде секогаш санкциониран за непрописното фрлање отпад, без разлика, како што наведоа, на неговите реакции, обиди за притисоци и префрлање на вината во јавноста.

Од претпријатието не одговорија која е причината за нередовното собирање на сметот. Дали е проблемот во недоволниот број камиони, немањето нафта? Ќе се преземе ли нешто и што за да се смени оваа ситуација?

Тие само информираа дека во средата, голем дел од специјалните комунални возила наменети за празнење на подземните и на надземните контејнери што биле упатени кон депонијата „Дрисла“, подолг временски период биле блокирани во близина на селото Батинци, поради новонастанатите проблеми во овој реон.

– Во моментов, овие возила се во функција и етапно ќе бидат испразнети надземните и подземните контејнери поставени на територијата на Градот Скопје (како и посочената локација близу кинеската Амбасада).

(А. П.) Фото: П. С.