Сиљановска го помилува Ѓоко Поповски кој беше осуден за набавката на „мерцедесот“

Претседателката Гордана Силјановска Давкова го помилува поранешниот помошник на министерот за јавни набавки во МВР, Ѓоко Поповски, кој беше осуден за злоупотреби при јавната набавка на фамозниот „мерцедес“ од 600.000 евра во случајот „Тенк“.

Поповски излегува на слобода по 9 години поминати во затвор, а одлуката за делумно помилување е потпишана од македонската претседателка со што тој е ослободен од понатамошно издржување на остатокот од казната. Во одлуката за помилување се наведува дека делумно се ослободува од понатамошно извршување на неиздржаниот дел од затворската казна.

Поповски беше осуден во предметите „Триста“ и „Тенк“ во случаи штои ги отвори Специјалното јавно обвинителство (СЈО), поврзани со злоупотреби во јавните набавки. За него често јавноста знаеше да каже дека е „единствениот“ осуден за криминалите во владеењето на претходниот премиер Никола Груевски.

Еден од симболите на случајот „Тенк“ — луксузниот „Мерцедес“, за кој Поповски беше осуден, сè уште е во сопственост на Службата за општи и заеднички работи при Владата. Претходната влада предводена од СДСМ најавуваше продажба на возилото, со образложение дека е луксузно и скапо за одржување, но тоа не беше реализирано.